მედიასაშუალების წინააღმდეგ მორიგი შემზღუდავი გადაწყვეტილება პროკურატურამ მიიღო.

რატომ არის მნიშვნელოვანი: Meduza იმ იშვიათ რუსულ გამოცემებს შორისაა, ვინც წლებია ვლადიმერ პუტინის რეჟიმს ღიად აკრიტიკებს.

  • ამის გამო 2021 წელს გახდა პირველი მედიასაშუალება, რომელსაც რუსეთში უცხო ქვეყნის აგენტის სტატუსი მიანიჭეს.
  • ეს სტატუსი უკვე არაერთ მედიას, არასამთავრობო ორგანიზაციას და აქტივისტს აქვს და კრემლი მათი დევნის მექანიზმად იყენებს.
  • მიუხედავად იმისა, რომ Meduza-ს უკვე არაერთი შეზღუდვა დაუწესდა, ისინი რუსეთის სამხედრო აგრესიას პირდაპირ უწოდებენ ომს და 337 დღეა განახლებად რეჟიმში აშუქებენ.
  • ამის გამო 2022 წლის გაზაფხულზე როსკომანდზორმა ვებგვერდი რუსეთში დაბლოკა.
  • მედუზას არასასრუველად გამოცხადების მოთხოვნით, პროკურატურას სამხედრო დაჯგუფება ვაგნერის ხელმძღვანელმა, ევგენი პრიგოჟინმა 2022 წლის ივნისში მიმართა.
  • დღევანდელ განცხადებაში პროკურატურა ამტკიცებს, თითქოს "მიღებული მასალების შესწავლის საფუძველზე" ლატვიაში ბაზირებული ორგანიზაციის, Medusa Project-ის საქმიანობა არასასურველად მიიჩნიეს, რადგან "საფრთხეს უქმნის კონსტიტუციური წესრიგის საფუძვლებს და ქვეყნის უსაფრთხოებას".

რას ნიშნავს არასასურველი ორგანიზაცია: კანონი "არასასურველი ორგანიზაციების" შესახებ 2015 წელს მიიღეს და პროკურატურას მიეცა უფლება მიენიჭოს ეს სტატუსი ნებისმიერ უცხოურ ან საერთაშორისო არასამთავრობო ორგანიზაციას, თუ დეპარტამენტი გადაწყვეტს, რომ მისი საქმიანობა საფრთხეს უქმნის "რუსეთის კონსტიტუციური წესრიგის საფუძვლებს, თავდაცვის შესაძლებლობებს ან უსაფრთხოებას".

  • პროკურატურა არ არის ვალდებული დაასაბუთოს თავისი მოსაზრება — რომელიმე ორგანიზაციის "არასასურველად" აღიარებისთვის სასამართლოს გადაწყვეტილება არ არის საჭირო და მხოლოდ საგარეო საქმეთა სამინისტროს ოფიციალური თანხმობა სჭირდებათ.
  • ასეთი ორგანიზაციების ანგარიშები იყინება, ხოლო შვილობილი კომპანიები იხურება.
  • ეს ნიშნავს, რომ რუსეთში, როგორც Meduza-ს თანამშრომლებს, ასევე მკითხველებს, რომლებმაც ფული შესწირეს გამოცემას, შესაძლოა, როგორც ადმინისტრაციული, ასევე სისხლის სამართლის პასუხისმგებლობა დაეკისროთ.
  • "მედუზასთან თანამშრომლობა ახლა უკანონოა, თუნდაც საზღვარგარეთ. თქვენ არ შეგიძლიათ გამოიყენოთ მათი ბმულები. ძველი ბმულების გამოც კი შეიძლება დაჯარიმდეთ", — განმარტავს Republic-ის მთავარი რედაქტორი.
  • 1 წლის წინ არასასურველად გამოაცხადეს გამოცემა პროექტიც, მაშინ მედუზა წერდა, რომ აიკრძალა მათი მასალების გადაბეჭდვა, სოციალურ ქსელებში გაზიარება და მოწონებაც კი — და ეს ეხებოდა არა მხოლოდ მედიას, არამედ მოქალაქეებსაც.

როგორ აფასებენ ამ გადაწყვეტილებას: რუსული კრიტიკული მედიებისა და არასამთავრობო სექტორის წარმომადგენლებმა უკვე დაგმეს კრემლის მორიგი თავდასხმა მედიაზე.

  • კრიტიკული მედია ნოვაია გაზეტა: "თავად ხართ არასასურველები. დარწმუნებული ვართ, რომ ჩვენი კოლეგების დევნის რეალური მიზეზები დაკავშირებულია მათი მუშაობის მაღალ პროფესიულ სტანდარტებთან უკრაინის წინააღმდეგ რუსეთის ფედერაციის კრიმინალური ომის გაშუქებაში".
  • TV Rain-ის რედაქტორი, ტიხონ დიატკო: "რუსეთის ხელისუფლებას ეშინია სიმართლის. ეშინიათ, რაც შეიძლება მეტმა ადამიანმა გაიგოს სიმართლე იმის შესახებ, რაც ხდება. ჩემი მხარდაჭერა მედუზას ყველა კოლეგას, თქვენ ყველაფერს სწორად აკეთებთ — გთხოვთ გააგრძელოთ იმავე სულისკვეთებით!"
  • კრიტიკული გამოცემა ბუმაგა: "გამოვხატავთ სოლიდარობას და მხარდაჭერას მეგობრებისა და კოლეგებისადმი. თქვენი შრომა ფასდაუდებელია რუსული ჟურნალისტიკისთვის და, შესაბამისად, თქვენ არასასურველი ხართ რუსეთის ფედერაციის გენერალური პროკურატურისთვის".
  • კრიტიკული გამოცემა Republic: "ჩვენი რედაქცია სოლიდარობას უცხადებს კოლეგებს. რუსეთის ხელისუფლებამ კანონგარეშე გამოაცხადა ერთ-ერთი საუკეთესო რუსული დამოუკიდებელი მედია უზარმაზარი აუდიტორიით. ეს სერიოზული დარტყმაა არა მხოლოდ კონკრეტული გამოცემისთვის, არამედ მთელი რუსული ჟურნალისტიკისთვის".
  • პროექტი როსკომსვაბოდა: "შეიძლება არ დაეთანხმო ჟურნალისტების და სტატიების ავტორების სტატიებსა და მოსაზრებებს, მაგრამ ამისათვის რეპრესიების ყველა ბერკეტის ჩართვა — ზუსტად ეს არის ის, რაც ეწინააღმდეგება "რუსეთის ფედერაციის კონსტიტუციური წესრიგის საფუძვლებს".