მსოფლიოში 1 800-ზე მეტი სახეობის ყველი არსებობს და მათგან საუკეთესო ასეულის შერჩევა ადვილი საქმე არ უნდა იყოს. თუმცა, ეს რთული მისია საკუთარ თავზე აიღო ვებსაიტმა TasteAtlas-მა, რომელიც ერთგვარად მსოფლიოს კულინარიულ გზამკვლევს წარმოადგენს.

ჩამონათვალში, რომელიც საიტის მომხმარებლების რეიტინგითაა შედგენილი, საამაყო ადგილი ქართულმა სულგუნმა დაიკავა. უფრო ზუსტად, შებოლილმა მეგრულმა სულგუნმა. ყველის ქართული სახეობა ვებსაიტის მომხმარებლებმა 5 ქულიდან 4,4-ით შეაფასეს, რითაც იგი 87-ე ადგილზე აღმოჩნდა.

"შებოლილი მეგრული სულგუნი ყველის ქართული სახეობაა, რომელიც ძროხის, თხის, კამეჩის რძისგან, ან სამივე მათგანის ნარევისგან მზადდება", — წერია TasteAtlas-ზე, — "ამ ნახევრად მაგარ ყველს თავისი ქერქის ქვეშ მკვრივი და დრეკადი ტექსტურა აქვს. რადგან ყველი შებოლილია, მას ბოლის სპეციფიკური არომატი დაჰკრავს, მაგრამ გემოთი მარილიანიცაა. შიგთავსი ყვითელი ფერისაა, ქერქი კი, შებოლვის შედეგად, გამაგრებული აქვს და მოყავისფრო-მოოქროსფრო ან მუქი ყავისფერია. შებოლილი სულგუნი განსაკუთრებით ადვილად დნება და მისი მირთმევა მთავარ მეგრულ კერძთან, ღომთან, ერთადაა სასურველი".

ამას გარდა, TasteAtlas მომხმარებლებს ურჩევს, შებოლილ სულგუნს და ღომს ქართული ღვინო, საფერავი, დააყოლონ.

რაც შეეხება ასეულის გამარჯვებულს, მსოფლიოში საუკეთესო ყველად ვებსაიტზე იტალიური პარმეზანი დასახელდა. აღსანიშნავია, რომ საუკეთესო ათეულში რვა სწორედ ყველის იტალიური სახეობაა.