ევროკომისიის პრეზიდენტს საქართველოს გავლით რუსეთის წინააღმდეგ დაწესებული სანქციების გვერდის ავლაზე ჰკითხეს.

რატომ არის მნიშვნელოვანი: არაერთხელ გაჟღერდა, რომ ოკუპანტი ქვეყანა საქართველოს სანქციების ასარიდებლად იყენებს.

  • ლაიენის ინტერვიუს წინ უძღოდა The New York Times-ში გამოქვეყნებული სტატია სახელწოდებით, როგორ აღწევს დასავლური საქონელი რუსეთში: სატვირთო მანქანების გრძელი რიგი საქართველოს გავლით.
  • მასალაში საუბარი იყო იმაზე, რომ საქონელი, რომლის რუსეთში გატანაც სანქციების გამო იკრძალება, იქ საქართველოდან აღწევს.

დეტალები: CNN-ის ჟურნალისტმა აღნიშნა, რომ აკრძალული საქონელი რუსეთში მაინც აღწევს, ბოლო ცნობების მიხედვით კი, ეს განსაკუთრებით, საქართველოს გავლით ხდება.

  • წამყვანი დაინტერესდა, როგორ უნდა მოხერხდეს ის, რომ სანქციების ქვეშ მყოფმა რუსეთმა ვეღარ მიიღოს ის, რაც სჭირდება.

ლაიენის განცხადებით, ხედავენ სანქციებზე გვერდის ავლის მცდელობებს და აღნიშნა, რომ ეს მიუღებელია.

  • მისივე თქმით, უკვე დაანონსებულია იმ პირთა სიის შედგენა, რომლებიც საქონელს ევროკავშირში ყიდულობენ და რუსეთში გააქვთ.
  • დასძენს, რომ მე-10 პაკეტი, ძირითადად, "ამ ხვრელების დახურვასა' და იმ ადამიანების სიაში შეყვანაზე იქნება ორიენტირებული, ვინც სანქციებისთვის თავის არიდებას უწყობს ხელს.