თბილისის მერია მუნიციპალურ ტრანსპორტში გადახდის ახალი სისტემის შექმნას გეგმავს. მისი საშუალებით, მომხმარებელი სწრაფი გადახდის აპარატებით, ბანკში და ინტერნეტ გვერდით შეძლებს შეიძინოს როგორც ერთჯერადი, ასევე ვადიანი, სამგზავრო აბონემენტები.

მერია აცხადებს, რომ გადახდის ახალი სისტემის შექმნაზე მუშაობა ივლისში დაიწყება და ერთი წლის თავზე ის სრულად ამოქმედდება.

ავტობუსში მგზავრი ქართული ბანკების მიერ გამოშვებულ საბანკო ბარათებს, სატრანსპორტო ბარათებსა და ასევე ვირტუალური გადახდის საშუალებებს გამოიყენებს:

"დაიხვეწება საინფორმაციო ვებ გვერდი და მობილური აპლიკაცია. ახალი სისტემა მოიცავს დისპეჩერიზაციის ავტომატურ სისტემასაც, რომელის საშუალებითაც მეტი სიზუსტით იქნება შესაძლებელი ავტობუსის განრიგის და მოსვლის დროის კონტროლი" - აცხადებს უწყება.

მერიის ინფორმაციით, მგზავრობის არსებული ტარიფი უცვლელი დარჩება, საბანკო ბარათებით გადახდისას კი, მომხმარებელი დამატებით არ გადაიხდის საბანკო მომსახურების საკომისიოს.

პროექტის ფარგლებში, გამოიცვლება ავტობუსებში არსებული მოძველებული გადახდის აპარატები და ისინი ახალი აპარატურით ჩანაცვლდება.

ამის გარდა, ტურისტები შეძლებენ მგზავრობის ღირებულება როგორც საქართველოში გამოშვებული სატრანსპორტო ბარათებით, ასევე უცხოური საბანკო ბარათებით გადაიხადონ.

მერია აცხადებს, რომ სისტემის მოდერნიზაციაზე კონკურსი უახლოეს დღეებში გამოცხადდება.