ამბებთან ჩვენი ურთიერთობა იმაზე ადრე იწყება, ვიდრე გვახსოვს. მეტიც — ამბების სხვადასხვა გზით მოყოლის უნარი ჯერ კიდევ მანამდე გვივითარდება, სანამ საუბარს დავიწყებდეთ. ამ ძალიან საჭირო უნარის გასავითარებლად კი, რასაკვირველია, ადრეული ასაკიდანვე წიგნთან ურთიერთობა და სიტყვების სახალისო მეთოდებით სწავლაა საჭირო.

სულაკაურის გამომცემლობისთვის პატარა მკითხველების შესაფერისი საკითხავით განებივრება ყოველთვის ერთ-ერთი მთავარი პრიორიტეტი იყო. ამას მოწმობს ბავშვებისთვის უკვე საყვარელი თუ ახალი სერიები, რომლებიც სიტყვების სასწავლ, რუდუნებით შედგენილ გამოცემებს აერთიანებს. სულაკაურის გამომცემლობაში სჯერათ, რომ წიგნის სიყვარულს ასაკი არ აქვს — ამის დასტურად კი წარმოგიდგენთ წიგნებს, რომლებიც სიტყვების სამყაროში ბავშვებს შეუცვლელ მეგზურობას გაუწევენ.

1. ჩემი პირველი წიგნი

ასაკი: 9 თვიდან

ეს სერია თემატური და ფერადი ფოტოებით გაფორმებულ წიგნებს აერთიანებს. ამგვარად ბავშვები სიტყვების ადვილად აღქმას და სწავლას შეძლებენ. აღსანიშნავია, რომ სერია ორ ასაკობრივ კატეგორიად იყოფა — განკუთვნილია ბავშვებისთვის 9 თვიდან და 18 თვიდან. პირველი მათგანი მოიცავს წიგნებს ისეთ თემებზე, როგორიცაა ყოველდღიურობის ნივთები, ცხოველები და ფერები. გამოცემებში თითოეულ გვერდზე თითო ფოტოა წარმოდგენილი.

რაც შეეხება კატეგორიას 18 თვიდან, ამ წიგნებში თითო გვერდზე 2-3 ფოტოს შეხვდებით. ფოტოები კი კვლავაც ასახავს სხვადასხვა ნივთს ანდაც ნაცნობ თუ უცნობ ცხოველებს.

სხვათა შორის, სერიის წიგნები პატარ-პატარა შეკითხვებსაც მოიცავს — მაგალითად, ბავშვს გვერდზე ხან ბუშტის პოვნა მოუწევს, ხანაც — მისი ფერის გამოცნობა. ეს ყველაფერი კი პატარას სიტყვის ადვილად დამახსოვრებაში დაეხმარება.

2. ჩემი პირველი 100 სიტყვა

ასაკი: 12 თვიდან

ეს წიგნი პატარა მკითხველისთვის სიახლეა. ის 100 სიტყვას აერთიანებს და მოიცავს 10 სხვადასხვა თემას. რეალისტური ნახატებით გაფორმებულ გვერდებზე ბავშვები შეხვდებიან მათთვის ნაცნობ თუ უცნობ ხილ-ბოსტნეულს, ცხოველებს, ტრანსპორტს და სხვა. წიგნის საშუალებით ახალი სიტყვების სწავლა სახალისო ხდება, მათი გააზრება და დამახსოვრება კი — ძალიან მარტივი.

3. იპოვე ნახატები, ისწავლე სიტყვები

ასაკი: 12 თვიდან

თემატურად და ასაკობრივად იყოფა წიგნების ეს სერიაც. მისი ზოგიერთი წიგნი 12 თვიდან ასაკის პატარებისთვისაა განკუთვნილი, ნაწილი კი — 18 თვიდან. კვლავაც მრავალფეროვანი და ცოცხალი ილუსტრაციებით გაფორმებულ გვერდებზე სიტყვები იმგვარადაა წარმოდგენილი, რომ ბავშვს ისინი თავისთავად "შემოესწავლება".

12 თვიდან ასაკის ბავშვებისთვის წიგნები მოიცავს პირველ სიტყვებს, ფერებსა და სოფლის თემატიკას. რაც შეეხება წიგნებს 18 თვიდან ბავშვებისთვის, მათში პატარები შეხვდებიან დიდ, სიუჟეტურ ნახატზე თავმოყრილ ნაცნობ თუ ჯერაც უცნობ ნივთებს, ცხოველებს და მათ დასახელებებს. ბავშვები შეძლებენ, წიგნის გვერდებზე დატანილი სიტყვების შესაბამისი ილუსტრაციები სწორედ ამ ნახატზე იპოვონ; ეს, ერთი მხრივ, ნასწავლი სიტყვის დამახსოვრებაში, მეორე მხრივ კი კონცენტრაციის მოკრებაში დაეხმარება მათ.

4. სიტყვების წიგნი

ასაკი: 2 წლიდან

სერია სიტყვების წიგნი პატარა მკითხველებისთვის სიახლეა და ამ ჩამონათვალში ყველაზე უფროსებისთვის, 2 წლიდან ასაკის ბავშვებისთვისაა განკუთვნილი. ამდენად, მასში პატარები შედარებით დეტალიზებულ და დატვირთულ სიუჟეტურ ილუსტრაციებსაც შეხვდებიან. თუმცა, სიტყვების სწავლასთან ერთად, ნაცნობი თუ ახალაღმოჩენილი ილუსტრაციების დიდ ნახატზე პოვნა კვლავაც ხალისიანი და შემეცნებითი პროცესი იქნება. თანაც, ეს ყველაფერი პატარებს ყურადღების, კონცენტრაციის და დეტალებზე ორიენტირების უნარებს განუვითარებს.

თითოეული წიგნი 100-ზე მეტ ფიგურას უყრის თავს — ცხადია, შესაბამისი დასახელებებით.

სერია სულ სამ წიგნს მოიცავს: თოვლიანი დღის სიტყვების წიგნი, მზიანი დღის სიტყვების წიგნი და ღამის სიტყვების წიგნი.

აღსანიშნავია, რომ ყველა ზემოხსენებული გამოცემა იმგვარადაა გათვლილი, რომ ბავშვი მას შეეხოს — ეს ხომ წიგნის შესაყვარებლად აუცილებელი პირობაა. ამდენად, წიგნები მყარი მუყაოსგანაა დამზადებული.

თქვენ კი, ყველა წიგნის შეძენა შეგიძლიათ, როგორც სულაკაურის გამომცემლობის წიგნის მაღაზიებში, ასევე ვებსაიტზე.