America's Got Talent-ის ანუ ამერიკული ნიჭიერის მაყურებელი საოცარი შესრულების მომსწრე გახდა.

ჟიურის წინ სცენაზე 29 წლის მენდი ჰარვი წარდგა, რომელმაც სმენა 18 წლის ასაკში დაკარგა. მისი თქმით, ის სმენის დაკარგვამდე მღეროდა და ძალიან უნდოდა, რომ მუსიკასთან ურთიერთობა გაეგრძელებინა.

"ვიპოვე გზა დავბრუნებოდი მუსიკას, კუნთოვანი მეხსიერებით, ბგერების ვიზუალიზაციით და ჩემი ხმის მიმართ ნდობით", უთხრა მენდიმ ჟიურის.

კონკურსანტმა თავისი დაწერილი სიმღერა Try შეასრულა.

"ეს სიმღერა მას შემდეგ დავწერე, რაც ჩემი ცხოვრება შეიცვალა, თავიდან ძალიან ცუდად ვიყავი, მაგრამ ახლა აღარ მინდა, რომ ჩემს მდგომარეობას შეგუებული ვიყო და ჩემი ცხოვრება სასოწარკვეთილებაში გავატარო", ამბობს მენდი.

"თავს ისე არ ვგრძნობ, როგორც ადრე,
ცა ლურჯის ნაცვლად ნაცრისფერია,
მაგრამ ვიცი, რომ არ გავჩერდები
და ჩემს ადგილს კვლავ ვიპოვი" - მღერის მენდი.

სიმღერით აღფრთოვანებულმა საიმონ ქოუელმა მენდი ოქროს ღილაკით პირდაპირ ნახევარფინალში გადაიყვანა.