საქართველოს ლიბერალურმა პარტიებმა, თავისუფალმა დემოკრატებმა და რესპუბლიკელებმა ევროპის ლიბერალ-დემოკრატიული პარტიის (ALDE) საბჭოს სხდომაზე ღრმა შეშფოთება გამოხატეს აზერბაიჯანელი ჟურნალისტის საქართველოს ტერიტორიიდან გატაცების ფაქტთან დაკავშირებით და საქართველოს ხელისუფლებისაგან მოითხოვეს გამოძიების დაუყოვნებლივ დაწყება.

რესპუბლიკური პარტიის ცნობით, თამარ კეკენაძისა და ხათუნა სამნიძის ერთობლივ განცხადებას უპასუხა ALDE-ს პრეზიდენტმა და ევროპარლამენტარმა ჰანს ვან ბაალენმა:

“ევროპელი ლიბერალები მხარს ვუჭერთ ჩვენს პარტნიორ პოლიტიკურ პარტიებს საქართველოში და საქართველოს ხელისუფლებისაგან მოვითხოვთ დაუყოვნებლივ გამოძიებას. აგრეთვე, ახსნა-განმარტებას აღნიშნულ გატაცების ფაქტთან დაკავშირებით. მხარდაჭერას ვუცხადებთ ლიბერალებს აზერბაიჯანში და ევროკავშირისგან ვითხოვთ მოახდინონ შესაბამისი ზეწოლა აზერბაიჯანის რეჟიმზე, რათა აფგან მუხთარლი და სხვა პოლიტიკური პატიმრები დაუყოვნებლივ განთავსუფლდნენ საპატიმროებიდან.

ALDE სრულ მხარდაჭერას უცხადებს მის წევრ პარტიას აზერბაიჯანში - „მუსავათს“ და მის ლიდერს არიფ ჰაიჯილის, რომელსაც ურთულეს პირობებში უწევს მოღვაწეობა და შეუპოვრად იბრძვის მკაცრი ავტორიტარული რეჟმის წინააღმდეგ, რათა დაიცვას ლიბერალური ღირებულებები ევროპის ერთ-ერთ ყველაზე რეპრესიული რეჟმის პირობებში".

საქართველოს რესპუბლიკური პარტიის ცნობით, 3 ივნისს ლიუბლიანაში გაიმართა ევროპის ლიბერალ-დემოკრატიული პარტიის (ALDE) საბჭოს სხდომა. ლიბერალებმა უმკაცრესად დაგმეს დამოუკიდებელი ჟურნალისტის და ადამიანის უფლებათა დამცველის აფგან მუხთარლის საქართველოდან გატაცების ფაქტი.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თავად მუხტარლის თქმით კი ის თბილისიდან გაიტაცეს. დედაქალაქში უკვე რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.