ქარჩხაძის გამომცემლობა რომ ერთგულ თუ ახალშეძენილ მკითხველს მუდამ ანებივრებს და საჩუქრებით გამოირჩევა, კარგად ნაცნობი ამბავია. სწორედ ამიტომაც გამომცემლობის გულშემატკივრები მუდამ ელიან სიახლეებს, წიგნებით დასაჩუქრებასა თუ სხვა აქტივობებს. რა თქმა უნდა, წინასაახალწლო პერიოდის ჯადოსნურობა, განწყობაზე ზრუნვა და მკითხველების გახარება ქარჩხაძის გამომცემლობის ერთ-ერთი მნიშვნელოვანი საზრუნავი წელსაც იყო.

50 მოგზაური წიგნის ამბავი ერთგულმა მკითხველმა გამომცემლობის Facebook პოსტის წყალობით გაიგო.

ფოტო: ქარჩხაძის გამომცემლობა

პოსტის კომენტარებში სხვადასხვა სურვილი იწერებოდა, მკითხველები გამომცემლობას საკუთარ სანატრელ, სასურველ წიგნს აცნობდნენ და მოუთმენლად ელოდნენ, მათთან თუ დაიდებდა ბინას ერთ-ერთი მოგზაური წიგნი. აღსანიშნავია, რომ მკითხველებმა ბოლომდე არ იცოდნენ, მათ სახელზე თუ იქნებოდა ამანათი გაგზავნილი. 25 დეკემბრიდან კი სურვილების ასრულების დროც მოვიდა, მოგზაურმა წიგნებმა პატრონები აირჩიეს და მოულოდნელად გახარებულმა მკითხველებმა აღტაცებაც ვერ დამალეს. სოციალურ ქსელებში 50 მოგზაური წიგნის ახალმა მეპატრონეებმა გამომცემლობას საკუთარი სურათები გაუზიარეს უამრავ სამადლობელ მესიჯთან ერთად.

ფოტო: ქარჩხაძის გამომცემლობა

50-მა მოგზაურმა წიგნმა მთელი საქართველოს მასშტაბით გაახარა მკითხველები — გურია, სამეგრელო, კახეთი, მცხეთა-მთიანეთი, აჭარა, ქართლი, იმერეთი, სამცხე-ჯავახეთი - ეს ის რეგიონებია, რომლებშიც მოგზაური წიგნები დაბინავდნენ.

"სურვილების ასრულების დროა" — ქარჩხაძის გამომცემლობის წინასაახალწლო სლოგანია, რომელიც ამ კამპანიას აშკარად მიესადაგება. სურვილებასრულებული, ბედნიერი მკითხველის ხილვა კი მუდამ სასიხარულოა. გამომცემლობა კვლავ ფიქრობს მკითხველისთვის საინტერესო სიახლეების, სასურველი წიგნებისა თუ აქცია-კამპანიების სამომავლოდ განხორციელებაზე.