ამის შესახებ ინფორმაციას მედუზა რუსეთის ადვოკატთა კავშირის ხელმძღვანელზე, იგორ ტრუნოვზე დაყრდნობით ავრცელებს.

რატომ არის მნიშვნელოვანი: პუტინმა სამხედრო მობილიზაცია რუსეთში 21 სექტემბერს გამოაცხადა, თუმცა მისმა გეგმამ კრახი განიცადა — გადაწყვეტილებას ქვეყანაში პანიკა და მოქალაქეების მასობრივი გადინება მოჰყვა.

  • მობილიზაციის პროცესი მნიშვნელოვანი დარღვევებით მიმდინარეობდა, რაც არაერთხელ გაშუქდა მედიაში — გამოუცდელი და გამოცდილი პირები შესაბამისი მომზადების, აღჭურვილობისა და ტექნიკის გარეშე გაუშვეს ფრონტზე.
  • 24 დეკემბერს უკრაინის დაზვერვაში განაცხადეს, რომ ყოველი მეოთხე მობილიზებული რუსი ფრონტის დატოვებას ცდილობს.
  • ახლა რუსეთი ყველა ღონეს ხმარობს, პერსონალის დანაკლისის შესავსებად.

დეტალები: როგორც ტრუნოვი ამბობს, რუსეთის ჯანდაცვის უწყება გამოყოფს ფინანსებს, რომელიც 2022-2024 წლებში მობილიზებულთა სპერმის უფასო კონსერვაციასა და შენახვას მოხმარდება.

  • რუსეთის ჯანდაცვის სამინისტროში ჯერ ოფიციალური კომენტარი არ გაკეთებულა.
  • ტრუნოვის თქმითვე, ამ წინადადებით უკვე მიმართა რუსეთის შს მინისტრსაც.