შესაბამისი განცხადება სახალხო დამცველის აპარატმა გაავრცელა.

რატომ არის მნიშვნელოვანი: 16 დეკემბერს, პარლამენტში იუსტიციის მინისტრს, რატი ბრეგაძეს ოპოზიცია მიხეილ სააკაშვილის ფოტოებით, საპროტესტო ბანერებითა და შეძახილებით შეხვდა.

  • ენმ-ს დეპუტატმა, ანა წითლიძემ ამ კონტექსტში ბრეგაძის შვილებიც ახსენა.
  • როგორც მოგვიანებით დეპუტატმა დაწერა, რატი ბრეგაძემ უნდა იცოდეს, რომ "მისი შთამომავლები ივლიან მკვლელი და მოღალატე მამის სახელით, რადგან ეს მისი იუსტიციის მინისტრობის განაჩენია".
  • თავად მინისტრმა წითლიძეს სექსისტური ფრაზით მიმართა: "უზრდელი ხარ, ქალბატონო, მაგრამ, მაგ უზრდელობაზე როგორ გიპასუხო, ქალი ხარ".

დეტალები: ომბუდსმენის შეფასებით, მსგავსი განცხადებები ბავშვის უფლებებსა და ინტერესებს ეწინააღმდეგება.

  • "ყოვლად დაუშვებელია ნებისმიერ პოლიტიკურ დისკურსში, არასრულწლოვანების ოჯახური კუთვნილების თუ სხვა ნიშნით გამორჩევა, რამაც შესაძლოა, საფრთხე შეუქმნას მათ ფსიქო-ემოციურ მდგომარეობასა და უსაფრთხოებას, მათ შორის, გამოიწვიოს ბავშვებს შორის შესაძლო ჩაგვრის წახალისებაც კი", — ნათქვამია განცხადებაში.
  • სახალხო დამცველი პარლამენტარებს მოუწოდებს, პოლიტიკური დისკუსიის წარმართვისას მაღალი პასუხისმგებლობა გამოიჩინონ და არ დაუშვან ერთმანეთის ოჯახის წევრების, მათ შორის, არასრულწლოვანების ნეგატიურ კონტექსტში მოხსენიება.
  • "დამატებით, მოვუწოდებთ საქართველოს პარლამენტს, პარლამენტის წევრის ეთიკის კოდექსით გათვალისწინებული დარღვევების შესწავლის, მონიტორინგისა და აღნიშნულზე ეფექტიანი რეაგირების მიზნით აამოქმედოს ეთიკის საბჭო", — ვკითხულობთ განცხადებაში.