შესაბამისი განცხადება უკრაინის სახალხო დამცველმა, დმიტრო ლუბინეცმა ტელეგრამ არხზე გაავრცელა.

რატომ არის მნიშვნელოვანი: 14 დეკემბერს, მას შემდეგ, რაც ექსპრეზიდენტი საკუთარ სასამართლო პროცესზე არ ჩართეს და მიზეზად ტექნიკური პირობების არარსებობა დაასახელეს, პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

  • კადრები აგვისტოდან დეკემბრის ჩათვლით თარიღდება და უხმოდ და უკონტექსტოდ არის შეკრული. 10-წუთიანი ვიდეოდან ბოლო პერიოდის კადრებს, რომლებიც სააკაშვილის ახლანდელ მდგომარეობას ასახავს, ყველაზე ნაკლები დრო, 19 წამი ეთმობა. ნაწილზე კი თარიღი საერთოდ არ ჩანს.
  • ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.

დეტალები: ლუბინეცის თქმით, უკრაინა, როგორც დემოკრატიული და ევროპული სახელმწიფო, მაქსიმალურ ყურადღებას დაუთმობს საზღვარგარეთ მყოფი მოქალაქეების უფლებებისა და ინტერესების დაცვას.

  • მისივე განცხადებით, "კრიტიკული მდგომარეობა, რომელშიც ახლა უკრაინის მოქალაქე, მიხეილ სააკაშვილია, განგაშსა და შეშფოთებას იწვევს".
  • "მიხეილ სააკაშვილის ჯანმრთელობის მდგომარეობა საგრძნობლად გაუარესდა. მე პირადად, როგორც უკრაინის ომბუდსმენს, საჭიროდ მიმაჩნია, დავრწმუნდე, რომ მის სიცოცხლეს საფრთხე არ ემუქრება.
  • მოვუწოდებ საქართველოს ხელისუფლებას, მომცეს საშუალება, მოვინახულო უკრაინის მოქალაქე, რომელიც ამჟამად თბილისში, სამედიცინო ცენტრ ვივამედში იმყოფება.
  • ქართულმა მხარემ უნდა უზრუნველყოს მისი სათანადო სამედიცინო დახმარება და სამედიცინო დაწესებულებაში მოთავსების სათანადო პირობები ან ხელი შეუწყოს გადაყვანას ევროპულ ან ამერიკულ სამედიცინო დაწესებულებებში", — წერს უკრაინის სახალხო დამცველი.

უკრაინის საგარეო უწყება, ასევე, შეშფოთებას გამოთქვამს სააკაშვილის ჯანმრთელობის მდგომარეობის გაუარესების გამო და ქართულ მხარეს მოუწოდებს, მას სათანადო სამედიცინო დახმარება გაუწიოს;

  • "ასევე, დააკმაყოფილოს მიხეილ სააკაშვილის სასჯელის გადადების თხოვნა, რათა შემდგომში გადაიყვანოს იგი ევროპის ან ამერიკის რომელიმე კლინიკაში", — ნათქვამია განცხადებაში.
  • გარდა ამისა, უწყება ითხოვს, დმიტრო ლუბინეცს სააკაშვილის მონახულების უფლება მიეცეს.