რუსთავი 2-ის საქმის მოსამართლე ნათია გუჯაბიძემ დღეს, 3 ივნისს, პასუხი გასცა ნიკა გვარამიას ბრალდებებს, რომელმაც ის თაღლითურ ქმედებაში დაადანაშაულა. გვარამიას მტკიცებით, ნათია გუჯაბიძე 2014 წელს, მაშინ, როცა დედის ბინაში ცხოვრობდა, სახელმწიფოს თავისი დედისთვის ახდევინებდა ბინის ქირას. გთავაზობთ გუჯაბიძის პასუხს, რომელიც მან სასამართლო პროცესის დაწყებამდე თქვა:

"მინდა გამოვეხმაურო საჯაროდ გავრცელებულ ბრალდებებს და მინდა როგორც მოსამარTლემ დავალაგო ფაქტობრივი შემადგენლობა და დავალაგო, რას მოიცავდა ეს განცხადებები. პირველი: ის, რომ რუსთავი 2-ს არ სურს მისი საქმე განიხილოს თაღლითმა მოსამართლემ. მეორე: ის, რომ მიმდინარეობს სისხლის სამართლებრივი დევნა ჩემი მისამართით მთავარ პროკურატურაში და მესამე: ის, რომ ჩემი მისამართით მიმდინარეობს დისციპლინური დევნა.როგორც თქვენთვის, ასევე საზოგადოების საყურადღებოდ, ვინაიდან მაღალია საზოგადოებრივი ინტერესი, სრული პასუხისმგებლობით ვაცხადებ:

იმისათვის, რომ მოსამართლე ნათია გუჯაბიძე დაკვალიფიცირდეს თაღლითად, უნდა არსებობდეს კანონიერ ძალაში შესული სისხლის სამართლებრივი განაჩენი, რაც ბუნებაში არ არსებობს.
სრული პასუხისმგებლობით ვაცხადებ და ამავე დროს მთავარმა პროკურატურამ გააკეთა განმარტება, რომ არანაირი სისხლის სამართლებრივი დევნა არათუ ახლა, არამედ ჩემი 11-წლიანი სამოსამართლეო მოღვაწეობის განმავლობაში არასოდეს არ მიმდინარეობდა არანაირი საჩივრის საფუძველზე.
სრული პასუხისმგებლობით ვაცხადებ, იუსტიციის უმაღლეს საბჭოში არანაირი დისციპლინური დევნა ჩემი მისამართით არ მიმდინარეობს და ჩემს მიმართ არ ყოფილა გამოყენებული სარეკომენდაციო წერილი.

მიუხედავად ამ ცრუ ბრალდებებისა და კონტექსტიდან ამოვარდნილი ინსინუაციებისა, მინდა დაგამშვიდოთ და გითხრათ, რომ ეს ჩემს განსჯაზე არანაირ ზეგავლენას არ მოახდენს.

მიმაჩნია, რომ მთელი ეს ბრალდებები მიმართულია როგორც ჩემი, მოსამართლე ნათია გუჯაბიძის, ისე სასამართლო სისტემის წინააღმდეგ მასზე ზეგავლენის მოხდენის მიზნით".