ინფორმაციას ამის შესახებ ნონა მამულაშვილი სოციალურ ქსელში ავრცელებს.

რატომ არის მნიშვნელოვანი: ერთიანი ნაციონალური მოძრაობის წევრთა ნაწილმა 9 ნოემბერს შიდაპარტიული არჩევნები, მათ შორის, ახალი თავმჯდომარის არჩევა მითხოვა.

  • იმავე დღეს, ნიკა მელიამ ბრიფინგი გამართა და თქვა, რომ არჩევნების ჩასატარებლად მზადაა, თუმცა პარტიელები ნაჩქარევი გადაწყვეტილების მიღებაში დაადანაშაულა.
  • არჩევნებში საკუთარი კანდიდატურები დააყენეს გიორგი ჩალაძემ და გიორგი მუმლაძემაც.
  • 10 ნოემბერს ლევან ხაბეიშვილმა თქვა, რომ პროცესში არ ჩაერთვებოდა, თუმცა 16 ნოემბერს გადაიფიქრა, თავისი კანდიდატურა დააყენა და გამოვიდა ინიციატივით, რომ მიხეილ სააკაშვილის მდგომარეობასთან დაკავშირებით შეიქმნას შტაბი, რომელსაც გიორგი ჩალაძე უხელმძღვანელებს. რის შემდეგაც ჩალაძემ კანდიდატურა მოხსნა.

დეტალები: ნონა მამულაშვილი პარტიის თავმჯდომარის არჩევნებში მიიღებს მონაწილეობას, პარტიის გენერალური მდივნობის კანდიდატად კი გიორგი ხვედელიანს ასახელებს.

  • მამულაშვილის განცხადებით, ცვლილებების სურვილისა და უკომპრომისო ბრძოლის მიუხედავად, მძიმე სისტემური პრობლემების გამო, პარტიის გაჯანსაღება შეუძლებელი ხდებოდა — "ამიტომ, სხვადასხვა დროს, თუმცა ერთი და იმავე მიზეზით, დავტოვეთ პარტია".
  • "ქვეყანაში არსებულ უმძიმეს კრიზისს, ოლიგარქიულ მმართველობას, პოლიტიკურ მართლმსაჯულებასა და დასავლური კურსიდან გადახვევას ნაციონალური მოძრაობა სუსტი და პოლიტიკისგან დაცლილი ებრძვის. თუმცა, საბედნიეროდ, ჩნდება ცვლილების შესაძლებლობა და ეს შიდაპარტიული არჩევნებია!" — წერს მამულაშვილი.

არჩევნები 28-29 იანვარს ბლოკჩეინის სისტემით ჩატარდება.

  • ნაყოფიას თქმით, ბლოკჩეინ სისტემით არჩევნების ჩატარებას 69 მომხრე და 1 მოწინააღმდეგე ჰყავდა.