პუტინის სავარაუდო დაზიანებისა და კრემლის პასუხის შესახებ Newsweek წერს.

რატომ არის მნიშვნელოვანი: მედიაში პერიოდულად ვრცელდება ინფორმაცია პუტინის ჯანმრთელობის მდგომარეობის შესახებ.

  • არსებობს ვარაუდები, რომ რუსეთის პრეზიდენტს ავთვისებიანი სიმსივნე ან პარკინსონის დაავადება აქვს.
  • უკრაინაში რუსეთის შეჭრის შემდეგ გააქტიურდა საუბარი პუტინის ფსიქიკურ ჯანმრთელობაზეც.
  • რუსი ოფიციალური პირები მუდმივ რეჟიმში უარყოფენ მეთაურის ჯანმრთელობის შესაძლო პრობლემებს.

დეტალები: თავდაპირველად Newsweek-მა ინფორმაცია გენერალ SVR-ზე დაყრდნობით გაავრცელა — ეს ტელეგრამ არხია, რომელსაც სავარაუდოდ რუსეთის დაზვერვის ყოფილი თანამშრომელი მართავს.

  • გენერალმა SVR-მა გასულ კვირას გამოაქვეყნა ვრცელი ამბავი, თუ როგორ გაატარა პუტინმა სამსახურში სტრესული დღე, რომელიც სავსე იყო სამხედრო და ეკონომიკური მარცხების შესახებ დისკუსიებით.
  • მათი ცნობით, დღის ბოლო რუსეთის პრეზიდენტი კიბიდან გადავარდა, ხუთი საფეხური გამოტოვა და კუდუსუნის ძვალი დაიზიანა. მოულოდნელმა ვარდნამ კი, სავარაუდოდ, უნებლიე დეფეკაცია (კუჭში გასვლა) გამოიწვია.
  • თუმცა, სამშაბათს Newsweek-სთვის გაგზავნილ ელფოსტაში, რუსეთის ფედერაციის პრეზიდენტის პრესისა და ინფორმაციის ოფისმა უარყო ეს ინფორმაცია.
  • "თქვენს მოთხოვნასთან დაკავშირებით, შეგვიძლია ვთქვათ, რომ ეს არის სრული სიცრუე", — განაცხადა კრემლმა.