დაბომბვაზე ინფორმაციას ადგილობრივი მედიები და გენერალური შტაბი ავრცელებს.

რატომ არის მნიშვნელოვანი: როგორც Unian აღნიშნავს, 17 ნოემბრის შემდეგ უკრაინაში ირანული დრონების შეტევა არ დაფიქსირებულა.

  • გასული დღის განმავლობაში კი შეიარაღებულმა ძალებმა 17 დრონი ჩამოაგდეს, მათ შორის 14 შაჰედ-136.
  • ჟიტომირის რეგიონული სამხედრო ადმინისტრაციის თავმჯდომარის, ვიტალი ბუნეჩკოს თქმით, ღამით, საჰაერო განგაშის დროს, მტერმა სცადა შეტევა ჟიტომირის ოლქზე შაჰედის ტიპის თვითმფრინავის გამოყენებით.

  • მისივე თქმით, დრონი საჰაერო თავდაცვის ძალებმა რეგიონის ჩრდილოეთით ჩამოაგდეს.

დეტალები: მედიის ცნობით, ბოლო 24 საათის განმავლობაში უკრაინამ კიდევ Orlan-10 უპილოტო საფრენი აპარატი და 2 დრონი ჩამოაგდო, რომელთა ტიპი ზუსტდება.

  • 6 დეკემბერს უკრაინის თავდაცვის ძალებმა მოიგერიეს ოკუპანტების თავდასხმები დონეცკისა და ლუგანსკის ოლქების 10 დასახლებაში.
  • დნეპროპეტროვსკის ადგილობრივი სამხედრო ადმინისტრაციის ხელმძღვანელი, ვალენტინ რეზნიჩენკო ტელეგრამზე წერს, რომ გასულ ღამეს, რუსებმა ოლქს შეუტიეს 8 უპილოტო საფრენი აპარატით და რვავე თავდაცვის ძალებმა ჩამოაგდეს.
  • დრონებით წუხელ ოკუპანტმა ზაპოროჟიეც დაბომბეს — საოლქო სამხედრო ადმინისტრაციის ხელმძღვანელის, ოლექსანდრ სტარუხის ცნობით, დრონებით და რაკეტებით შეტევის შედეგად, ორ სოფელში დაინგრა 3 სახლი და 18 დაზიანდა და დაიჭრა 3 ადამიანი, მათ შორის, 15 წლის გოგო.
  • სტარუხის თქმით, უკრაინის თავდაცვის ძალებმა 6 უპილოტო საფრენი აპარატი ჩამოაგდეს.

კონტექსტი: რუსეთმა უკრაინის მშვიდობიან მოსახლეობასა და სამოქალაქო ინფრასტრუქტურაზე თავდასხმისთვის ირანული წარმოების ასობით დრონი გამოიყენა.

  • ირანის ხელისუფლებამ არაერთხელ უარყო რუსეთისთვის საფრენი აპარატების მიწოდება, მაგრამ საერთაშორისო თანამეგობრობას, ამის არ სჯეროდა, რის გამოც სანქციები დააწესეს.
  • ირანის საგარეო საქმეთა მინისტრმა 5 ნოემბერს პირველად აღიარა, რომ უპილოტო თვითმფრინავების "მცირე რაოდენობა" რუსეთს ომამდე რამდენიმე თვით ადრე მიაწოდა.
  • ISW ირანულ მედიაზე დაყრდნობით წერს, რომ ირანის შეიარაღებული ძალების გენერალური შტაბის უფროსი, გენერალ-მაიორი მოჰამედ ბაგერი, 3 დეკემბერს თეირანში რუსეთის თავდაცვის მინისტრის მოადგილეს, გენერალ პოლკოვნიკ ალექსანდრ ფომინს შეხვდა.
  • ISW ვარაუდობს, რომ მათ რუსეთისთვის უკრაინაში გამოსაყენებლად ირანული თვითმფრინავებისა და რაკეტების მიყიდვა განიხილეს.
  • გარდა ამისა, The Washington Post წყაროებზე დაყრდნობით წერს, რომ ირანი რუსეთს დრონების წარმოებაში დაეხმარება.