საქართველოს პრეზიდენტი, გიორგი მარგველაშვილი ფიქრობს, რომ სახელმწიფო აუდიტის სამსახური სწორი მიმართულებით ვითარდება. ამის შესახებ მან აუდიტის სამსახურის ხელმძღვანელთან, ლაშა თორდიასთან შეხვედრისას ისაუბრა.

სახელმწიფო აუდიტის სამსახურის საქმიანობაზე საუბრისას მარგველაშვილმა აღნიშნა, რომ უწყება ქვეყანას დიდ სამსახურს უწევს, რადგან ეფექტური ხარჯვა სახელმწიფო სტრუქტურების ეფექტურ მუშაობაში ეხმარება.

„სამწუხაროა, რომ უკვე მერამდენედ მიხდება სახელმწიფო ინსტიტუტების დაცვა. ის, რაც მოხდა რამდენიმე კვირის წინ, ამას სჭირდება ძალიან ნათელი და პირდაპირი პასუხი. ჩვენ დღეს ვხედავთ ერთსა და იმავე ტენდენციას. მოხდება რაღაც პრობლემური, შემდეგ ხდება შეფუთვა, ჩაფარცხვა, გადაპიარება და ვხედავთ იმას, რომ არა მარტო კონკრეტული პრობლემები პასუხგაუცემელია, არამედ კითხვები ისმის უმნიშვნელოვანეს კონსტიტუციური სახელმწიფოებრივი ინსტიტუტების დაცულობასთან მიმართებაში,“ - განაცხადა მარგველაშვილმა.

სახელმწიფო აუდიტის სამსახურის 2016 წლის ანგარიში პირველ ივნისს გასაჯაროვდა. ანგარიშის მიხედვით, გასულ წელს აუდიტებით გამოვლენილი დარღვევების საერთო მოცულობა 71 მილიონი ლარი იყო. ამისთვის აუდიტის სამსახურმა სულ 71 აუდიტი ჩაატარა და 10,3 მილიარდი ლარის ხარჯები შეამოწმა.