საქართველოს პრეზიდენტი, გიორგი მარგველაშვილი, კიდევ ერთხელ გამოეხმაურა თბილისიდან გატაცებული აზერბაიჯანელი ჟურნალისტის, აფგან მუხტარლის, საქმეს.

პრეზიდენტმა განაცხადა, რომ სახელმწიფოში მოქმედებს სერიოზული პიარკამპანიები, მნიშვნელოვანი საკითხების გადასაფარად, რის გამოც რჩება პასუხგაუცემელი კითხვები და ქვეყნის იმიჯი სერიოზულად ილახება:

"სულ რამდენიმე დღის წინ, თბილისში გაქრა ადამიანი, ბაქოში აღმოჩნდა ადამიანი! მთელი საზოგადოება, ბავშვებს რომ ფოკუსს აჩვენებენ, ასე ვზივართ და უნდა მოვიფიქროთ, რომ როგორ ხდება ასეთი რამე, რომ ადამიანი A პუნქტში ქრება და B პუნქტში ჩნდება. ბავშვს რომ ფოკუსს გაუკეთებ, არ ვიცი ვის უნდა ვკითხო, კოპერფილდს უნდა ვკითხო? ვადაჭკორიას უნდა ვკითხო? ვის უნდა ვკითხო? რანაირად უნდა მოხდეს A პუნქტიდან ადამიანის გაქრობა და B პუნქტში გაჩენა. და ამასთან ერთად, თურმე მშვიდად უნდა დაველოდოთ პროცესებს. ილახება ქვეყნის იმიჯი!"

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.