ამის შესახებ აშშ-ის პრეზიდენტმა ფრანგ კოლეგასთან ერთობლივ პრესკონფერენციაზე ისაუბრა.

რატომ არის მნიშვნელოვანია: ჯო ბაიდენმა აღნიშნა, რომ ამ ეტაპზე არ აქვს გეგმები, დაუკავშირდეს პუტინს, მაგრამ მზად არის ესაუბროს, თუ ის მართლა ეძებს გზებს ომის დასასრულებლად.

  • "მას ეს ჯერ არ გაუკეთებია", — დაამატა პრეზიდენტმა.
  • მანვე განაცხადა, რომ ამ ომის დასასრულის ერთადერთი რაციონალური გზა არსებობს — პუტინმა უნდა დატოვოს უკრაინა.

დეტალები: ბაიდენისა და მაკრონის შეხვედრა 2 საათზე მეტ ხანს გაგრძელდა, რის შემდეგაც თეთრ სახლში ჟურნალისტებისთვის პრესკონფერენცია გაიმართა.

  • ორივე ქვეყნის ლიდერმა დაადასტურა უკრაინის მხარდაჭერა.
  • აშშ-ის პრეზიდენტმა აღნიშნა, რომ თუ პუტინთან ისაუბრებს, მხოლოდ და მხოლოდ ნატოს მოკავშირეებთან კონსულტაციის შემდეგ.
  • მაკრონმა კი ტრადიციულად თქვა, რომ როგორც კი უკრაინა დააყენებს პირობებს სამშვიდობო შეთანხმებისთვის, ის მზადაა პუტინს ესაუბროს.

კონტექსტი: უკრაინის პრეზიდენტი ომის დაწყების დღიდან იმეორებდა, რომ მზად არის რუს კოლეგასთან მოლაპარაკებებისთვის, თუმცა 4 რეგიონის ანექსიის შემდეგ, მან ხელი მოაწერა ეროვნული უსაფრთხოებისა და თავდაცვის საბჭოს გადაწყვეტილებას და ვლადიმერ პუტინთან მოლაპარაკებები ოფიციალურად გამორიცხა.

  • ვოლოდიმირ ზელენსკიმ თქვა, რომ დიალოგისთვის ისევ მზად არის, თუმცა მხოლოდ სხვა პრეზიდენტთან.
  • პასუხად კრემლში განაცხადეს, რომ ზელენსკის პოზიციის შეცვლას ან უკრაინის ახალ პრეზიდენტს დაელოდებოდნენ.
  • რამდენიმე კვირის შემდეგ მოლაპარაკებებში აქტიურად მონაწილე თურქეთის პრეზიდენტმა, რეჯეფ ტაიპ ერდოღანმა თქვა, რომ პუტინი "ბევრად რბილი და ღიაა მოლაპარაკებებისთვის, ვიდრე ადრე".
  • უკრაინის მტკიცე უარის შემდეგ, კრემლი დასავლეთთან მოლაპარაკებების შესაძლებლობაზეც ალაპარაკდა.