ხაშურის მუნიციპალიტეტის სოფელ ცხრამუხაში, სურამისა და ხაშურის ეპარქიის დედათა მონასტერში ორი პირის შეიჭრას სამი პარტია გამოეხმაურა.

რატომ არის მნიშვნელოვანი: თავდამსხმელები ფიზიკურად გაუსწორდნენ მონასტრის წინამძღვარს და მონაზვნებს. ერთ-ერთი მონაზონი კი მრავლობითი დაზიანებებით საავადმყოფოში გადაიყვანეს.

• გამოძიება სისხლის სამართლის კოდექსის 179-ე და 137-ე მუხლებით დაიწყო, რაც ყაჩაღობას და გაუპატიურებას გულისხმობს.

დეტალები: პარტიების განცხადებით, მმართველმა პარტიამ დაუცველობა, შიში და სისასტიკე ცხოვრების წესად და ნორმად აქციეს და ბოლო დღეებში მომხდარ დანაშაულებზე პასუხისმგებლობას ქართულ ოცნებას აკისრებენ.

• პარტიები ამბობენ, რომ მოძალადე სახელმწიფოს ფიზიკური თუ სიტყვიერი თავდასხმების სამიზნე, პოლიტიკურ მოწინააღმდეგეებთან ერთად, არიან ჟურნალისტები, სამოქალაქო ორგანიზაციები, საქართველოს საერთაშორისო პარტნიორები, ყველა, ვინც მიუღებელია ხელისუფლებისთვის.
• "დაუცველია ყველა — ბავშვები, ქალები, ჟურნალისტები, აქტივისტები, პოლიტიკოსები", — ნათქვამია განცხადებაში.
• სამი პარტიის თქმით, ძალადობა და ტყუილი ქართული ოცნების მმართველობის მთავარი ნიშნებია.
• მათივე თქმით, თუკი ქართული ოცნების მმართველობის საწყის ეტაპზე სახელმწიფო ტერორი პოლიტიკურ ოპონენტებსა და მოწყვლად ჯგუფებს ეხებოდა, დღეს ძალადობრივმა გარემომ საზოგადოების თითქმის ყველა სეგმენტში შეაღწია.

ამასთან, მათი თქმით, ძალადობრივ გარემოს ამძიმებს სახელმწიფოს შეთანხმება კრიმინალურ სამყაროსთან, რომლის თანახმადაც, ძალაუფლების შენარჩუნებაში დახმარების სანაცვლოდ, კრიმინალურ საქმიანობაში ჩართულ პირებს უკანონო შეღავათები უწესდებათ.

• ამბობენ, რომ სახელმწიფო ქმნის და ხელს უწყობს პრორუსულ, კრიმინალურ დაჯგუფებებს, რომელთა ამოცანა ხელისუფლებისთვის მიუღებელ ადამიანებზე ძალადობაა.
• "აღნიშნულის შედეგია 2013 წლის 17 მაისს რამდენიმე უდანაშაულო ახალგაზრდის წინააღმდეგ განხორციელებული მძიმე ძალადობა, ასევე, 2021 წლის 5 ივლისს, პროკრემლისტური ჯგუფების მიერ ჟურნალისტების წინააღმდეგ ჩადენილი მძიმე დანაშაულების სერია, რომელიც ლექსო ლაშქარავას გარდაცვალებით დასრულდა", — ნათქვამია განცხადებაში.

სამ პარტიის განცხადებით, სახელმწიფო უკანონოდ მფარველობს მისსავე შექმნილ ძალადობრივ ჯგუფებს, რაც საქართველოსთვის ევროკავშირის კანდიდატის სტატუსის მიღების გზაზე მნიშვნელოვან დაბრკოლებად იქცა.

• მიიჩნევენ, რომ ნებისმიერი ტიპის ძალადობა, მათ შორის ბოლო დღეებში გავრცელებული ძალადობის ტრაგიკული ფაქტები, ქვეყანაში შექმნილი უმძიმესი ატმოსფეროს შედეგია.
• "სამწუხაროდ, შეუძლებელია აღნიშნულ ფაქტებზე იზოლირებული რეაგირებით არსებული პრობლემების გადაჭრა. ძალადობრივი ფონის შესაცვლელად, ვითარების გაჯანსაღებისათვის აუცილებელია ფუნდამენტური და კომპლექსური პოლიტიკური და საზოგადოებრივი ცვლილებები", — ვკითხულობთ განცხადებაში.