ჩემოდანში შეპარული კატა აეროპორტში შემოწმებისას თავისივე ჟღალმა ბეწვმა გაყიდა

ვერასდროს გაიგებ, კატის თავში რა ტრიალებს; რაზე ფიქრობენ, როცა ხან აკრობატობას გადაწყვეტენ ხოლმე და ხანაც — ფიზიკის კანონებთან დაპირისპირებას.

ამჯერად, აშშ-ში ფისომ თვითმფრინავით გასეირნება მოისურვა თურმე და ერთ-ერთი მგზავრის ჩემოდანში შეუმჩნევლად შეძვრა. მშვენიერი სამალავი კი აირჩია, მაგრამ აშკარად ვერ გათვალა, რომ მისი ჟღალი ბეწვი შეუმჩნეველი არ დარჩებოდა — მით უმეტეს, როცა ჩემოდნის ელვაშესაკრავში ღრიჭო დარჩა.

როცა ნიუ-იორკის ჯონ კენედის აეროპორტში უსაფრთხოების ოფიცრებმა ბარგის კონტროლი დაიწყეს, რენტგენულ გამოსახულებაში საეჭვო მოხაზულობის "ობიექტი" დააფიქსირეს. გახსნის შემდეგ კი ჩემოდნიდან არხეინად მოკალათებული კატა ამოიყვანეს.

როგორც მოგვიანებით გაირკვა, ონავარი ფისოს პატრონი ბარგის მფლობელი არც კი ყოფილა. თუმცა, ამ უკანასკნელმა მასში თავისი თანამცხოვრების ოთხფეხა მეგობარი ამოიცნო და კატაც უვნებლად დაბრუნდა შინ.

ერთი კია — მგზავრს თავისი რეისის გამოტოვება მოუწია და მისმა ფრენამაც ერთი დღით გადაიწია.

თუმცა, ამ შემთხვევის ამსახველი ფოტომასალა ტვიტერზე გავრცელდა და ინტერნეტმომხმარებლებმაც იხალისეს.

We’re letting the cat out of the bag on a hiss-toric find. This CATch had our baggage screening officers @JFKairport saying, “Come on meow”! Feline like you have travel questions reach out to our furiends @AskTSA. They’re available every day, from 8 a.m. – 6 p.m. (ET). pic.twitter.com/LpIkLbAgzC
— TSA (@TSA) November 22, 2022

მართალია, ფისო უვნებლად გადარჩა, მაგრამ კატებისთვის, რა თქმა უნდა, არც ჩემოდანში მგზავრობაა მისაღები და, მით უმეტეს, არც აეროპორტში ბარგის შემოწმებისას რენტგენით დასხივება.

ბოლო ამბები:

გირჩევთ