კიბერშეტევის შესახებ ევროპარლამენტის პრეზიდენტი ტვიტერზე წერს.

დეტალები: რობერტა მეცოლას განცხადებით, პასუხისმგებლობა შეტევაზე კრემლის მომხრე დაჯგუფებამ აიღო.

• მისივე თქმით, IT გუნდი ცდილობს, რომ წინააღმდეგობა გაუწიონ და დაიცვან სისტემები.
• ევროპარლამენტის პრეზიდენტმა ჰაკერებს პასუხიც გასცა და განაცხადა, რომ მისი გამოხმაურებაა: "დიდება უკრაინას.

რატომ არის მნიშვნელოვანი: უკრაინის პრეზიდენტმა, ვოლოდიმირ ზელენსკიმ არაერთხელ მოუწოდა სხვადასხვა ქვეყანას რუსეთი ტერორიზმის სპონსორ სახელმწიფოდ აღიაროს.

• ცალკეულმა ქვეყნებმა, როგორებიც არიან ლიეტუვა, ლატვია, ესტონეთი და პოლონეთი უკვე გამოაცხადეს რუსეთი ტერორიზმის სპონსორ სახელმწიფოდ.
• დღეს კი ევროპელმა კანონმდებლებმა მიიღეს რეზოლუცია, რომელიც რუსეთს ტერორიზმის სპონსორ სახელმწიფოს უწოდებს.

რეზოლუციის მიღებას მხარი 494-მა დეპუტატმა დაუჭირა, 44-მა თავი შეიკავა, 58 კი წინააღმდეგი იყო.

• ევროპარლამენტარებმა ხაზგასმით აღნიშნეს, რომ რუსული და მათი მარიონეტული ძალების მიერ უკრაინაში მშვიდობიანი მოსახლეობის წინააღმდეგ ჩადენილი მიზანმიმართული თავდასხმები წარმოადგენს ომის დანაშაულს.
• იმის გამო, რომ ევროკავშირს ამჟამად არ შეუძლია ოფიციალურად დაასახელოს სახელმწიფოები ტერორიზმის სპონსორებად, პარლამენტი მოუწოდებს ევროკავშირს და მის წევრ ქვეყნებს, შექმნან შესაბამისი სამართლებრივი ბაზა და განიხილონ რუსეთის დამატება ასეთ სიაში.
• "ეს გამოიწვევს მთელ რიგ მნიშვნელოვან შემაკავებელ ზომებს მოსკოვის წინააღმდეგ და ღრმა შემზღუდველ გავლენას მოახდენს ევროკავშირის რუსეთთან ურთიერთობებზე", — აღნიშნულია ევროპარლამენტის განცხადებაში.
• პარლამენტი მოუწოდებს ევროკავშირს, გააგრძელოს რუსეთის საერთაშორისო იზოლაცია.
• ევროპარლამენტარებს ასევე სურთ რუსეთთან დიპლომატიური ურთიერთობების შემცირება.

გარდა ამისა, რეზოლუცია დამატებით მოუწოდებს საბჭოში ევროკავშირის წევრ ქვეყნებს, სწრაფად დაასრულონ მუშაობა მოსკოვის წინააღმდეგ სანქციების მეცხრე პაკეტზე.

• ევროპარლამენტარებს ასევე სურთ, რომ ევროკავშირის ქვეყნებმა აქტიურად აღკვეთონ, გამოიძიონ და დაისაჯონ მოქმედი სანქციების ნებისმიერი გვერდის ავლა და ევროკომისიასთან ერთად განიხილონ შესაძლო ზომები იმ ქვეყნების წინააღმდეგ, რომლებიც ცდილობენ დაეხმარონ რუსეთს უკვე დაწესებული შემზღუდავი ზომების გვერდის ავლით.

ვოლოდიმირ ზელენსკიმ თქვა, რომ მიესალმება ევროპარლამენტის გადაწყვეტილებას.

• "რუსეთი ყველა დონეზე იზოლირებული უნდა იყოს და პასუხისგებაში უნდა მიეცეს, რათა შეწყვიტოს თავისი მრავალწლიანი ტერორიზმის პოლიტიკა უკრაინასა და მთელ მსოფლიოში", — წერს ის.
• "რუსეთს აქვს სუვერენული სახელმწიფოების წინააღმდეგ ტერორისტული აქტების ისტორია, ტერორისტული რეჟიმებისა და ორგანიზაციების მხარდაჭერა, მათ შორის ვაგნერი, ტერორის ომი უკრაინაზე", — დაწერა უკრაინის საგარეო საქმეთა მინისტრმა.