პოლონეთის პრეზიდენტმა, ანდჟეი დუდამ პარლამენტის ეროვნულ ბიბლიოთეკაში სტუმრობისას ყურადღება გაამახვილა საქართველო-რუსეთის 2008 წლის ომზე და აღნიშნა, რომ საქართველო ამ ომში მარტო არ ყოფილა, პოლონეთი იყო საქართველოს უპირობო მხარდამჭერი და მოკავშირე. მისი თქმით, ამის დასტური პოლონეთის ყოფილი პრეზიდენტის, ლეხ კაჩინსკის ვიზიტი იყო საქართველოში, ლიტვის, ლატვიის და ესტონეთის ლიდერებთან ერთად.

როგორც პოლონეთის პრეზიდენტმა აღმისი თქმით, ლეხ კაჩინსკი ყოველთვის გამოხატავდა პროტესტს რუსეთის აგრესიული პოლიტიკის წინააღმდეგ, ვინაიდან იცოდა, რომ ეს საშიში იყო არა მხოლოდ საქართველოსთვის, არამედ მთელი ევროპისთვის.

დუდამ აგრეთვე ისაუბრა საქართველო-პოლონეთის სამომავლო ურთიერთთანამშრომლობაზე. მან ისაუბრა საქართველოს ნატოში შესვლაზე და აღნიშნა, რომ საქართველოს წინაშე კვლავ მრავალი გამოწვევაა და ამ მხრივ კვლავ ბევრი სამუშაო. მისი თქმით, ის გულითადი კავშირი, რაც საქართველოსა და პოლონეთს შორისაა, ნიშნავს საერთო პასუხისმგებლობას და ერთობლივ მოქმედებას დასახული მიზნის მისაღწევად.

ანდჟეი დუდამ ხაზი გაუსვა პოლონეთსა და საქართველოს კულტურათა შორის ერთიანობასაც. ის იმედოვნებს, რომ სამომავლოდ, ამ ორი ქვეყნის წარმომადგენლები გააგრძელებენ მემკვიდრეობას და ბევრ სამეცნიერო პროექტში ითანამშრომლებენ. მან ისაუბრა პოლონეთ-საქართველოს ისტორიკოსთა კომისიის მუშაობასა და მის მნიშვნელობაზე. როგორც მან აღნიშნა, შვიდი ისტორიკოსისგან შემდგარი გუნდი აქტიურად მუშაობს ნაშრომზე, რომელიც ამ ორი ქვეყნის ისტორიას გააერთიანებს. კომისია შეიქმნა ვარშავის უნივერსიტეტში, აღმოსავლეთ ევროპის კათედრის ინიციატივით.

მან შეხვედრა დაასრულა პოლონეთის ყოფილი პრეზიდენტის, ლეხ კაჩინსკის სიტყვებით - საქართველოს და პოლონეთს აერთიანებთ ის, რომ მათ არ ეშინიათ, არ უნდათ არავის დაქვემდებარება და არც არავისთვის აპირებენ ქედის მოხრას.