დღეს, 3 ივნისს, პარლამენტის რიგგარეშე სხდომაზე საკონსტიტუციო სასამართლოს შესახებ კანონში შეტანილ ცვლილებებთან დაკავშირებით, პრეზიდენტის შენიშვნებზე იმსჯელებენ.

1 ივნისს, პრეზიდენტმა გიორგი მარგველაშვილმა საკონსტიტუციო სასამართლოს შესახებ კანონში შესატან ცვლილებებს ვეტო დაადო. ამის შემდეგ, სამოქალაქო სექტორმა განაცხადა, რომ პრეზიდენტმა აღნიშნულ კანონთან დაკავშირებული ცვლილებების შემუშავებისას ვენეციის კომისიის დოკუმენტი სრულად არ გაითვალისწინა.

პრეზიდენტის განცხადებით, ვეტოში გაითვალისწინა ყველაფერი, რაც ეწერა ვენეციის კომისიის დასკვნაში:

"ეს იყო ის დოკუმენტი, რომლის ირგვლივაც ჩვენ ვსაუბრობდით. გასაგებია, რომ შეიძლება რომელიღაც ექსპერტების და ვენეციის კომისიის სურვილები ზოგიერთ შემთხვევაში არ ემთხვეოდეს ერთმანეთს, მაგრამ ჩვენთვის ამოსავალი იყო ვენეციის კომისიის დოკუმენტი".

საკონსტიტუციო სასამართლოს შესახებ კანონში ცვლილებები პარლამენტმა 14 მაისს მიიღო. შემდეგ ის პრეზიდენტს, პრეზიდენტმა კი დასკვნისთვის ვენეციის კომისიას გადაუგზავნა.