პოლონეთის პრეზიდენტის სახელმწიფო ვიზიტის ფარგლებში, გიორგი მარგველაშვილმა და ანდჟეი დუდამ პირისპირ და გაფართოებული შეხვედრების შემდეგ, ერთობლივ დეკლარაციას მოაწერეს ხელი.

"საქართველო და პოლონეთი ხაზგასმით აღნიშნავენ საერთაშორისო თანამეგობრობის ერთიანი ძალისხმევის მნიშვნელობას საქართველოს რეგიონების - აფხაზეთისა და ცხინვალის რეგიონის/სამხრეთ ოსეთის ოკუპაციისა და მათი ანექსიისაკენ მიმართული ნაბიჯების წინააღმდეგ, რათა უზრუნველყოფილი იქნას მშვიდობა და უსაფრთხოება.

პოლონეთი მტკიცედ უჭერს მხარს საქართველოს მისწრაფებებს ევროკავშირსა და ნატოში გაწევრიანების კუთხით.

საქართველო და პოლონეთი აღიარებენ შავი ზღვის რეგიონის მნიშვნელობას საერთო ევროატლანტიკური უსაფრთხოებისათვის. საქართველო მიესალმება ნატო-ს ყოფნას შავი ზღვის რეგიონში და გამოთქვამს მზადყოფნას ხელი შეუწყოს მოკავშირეთა ძალისხმევას ამ კუთხით. პოლონეთი აღიარებს საქართველოს აქტიური ჩართულობის მნიშვნელობას შავი ზღვის რეგიონის უსაფრთხოების განმტკიცების საქმეში" - ნათქვამია ერთობლივ დეკლარაციაში, რომელიც პოლონეთ-საქართველოს ურთიერთთანადგომის განსამტკიცებლად დაიწერა.

დღეს პოლონეთის პრეზიდენტის საქართველოში ვიზიტი მარგველაშვილთან შეხვედრით დაიწყო.