რუსი პოპ მომღერლის, ალისა ვოკსის ახალი სიმღერა, ახალგაზრდებს პროტესტს ეხება, მაგრამ განსხვავებით სხვა პოლიტიკური ტექსტებისგან, ეს სიმღერა ადამიანებს ხელისუფლების მორჩილებისკენ მოუწოდებს.

"დილას მიდი მიტინგზე, პლაკატზე შეცდომები აქვს - ოთხი, ორ სიტყვაში", - მღერის ალისა პირველივე წამებზე.

შემდეგ ტექსტში ვისმენთ, რომ თუ ვინმეს ცვლილებები უნდა, ჯერ საკუთარი თავიდან უნდა დაიწყოს და მიტინგებსა და საპროტესტო აქციებზე სიარულის გამო სკოლა არ უნდა გააცდინონ და ცუდი ნიშნები არ უნდა მიიღონ.

"თავისუფლება, ფული, გოგოები - ძალაუფლებაც კი გექნება. ნუ ჩაერევი, პატარავ, პოლიტიკაში, წადი და ისწავლე", მოუწოდებს ალისა ვოკსი თავის მსმენელს.

რუსი ოპოზიციონერები ამბობენ, რომ ამ კლიპისთვის ალისა ვოკსს კრემლმა ფული გადაუხადა, ხოლო თავად მომღერალი აცხადებს, რომ დაიღალა პოლიტიკაზე შეკითხვებით და ვერ ხვდება, რატომ ჩაითრიეს ამ დისკუსიაში.

"მე გული შემტკივა იმ ადამიანებზე, რომლებსაც ატყუებენ და გონებას ურევენ", - ამბობს ვოკსი.