ექიმებმა, ექთნებმა და მძღოლებმა პირობების გაუმჯობესების მოთხოვნით მორიგი საპროტესტო აქცია გამართეს.

რატომ არის მნიშვნელოვანი: პროტესტის მონაწილეები ივლისში ჯანდაცვის მინისტრის მოადგილეს შეხვდნენ და მოთხოვნები გააჟღერეს — უწყება მათ 2023 წელს ხელფასების 10%-იან ზრდას დაჰპირდა.

  • სასწრაფოს თანამშრომლები აცხადებენ, რომ ამ დაპირების შესრულება საკმარისი არ არის, რადგან არსებული ხელფასიც მიზერულია და მაღალი ინფლაციის პირობებში ეს მატება არაფერს შეცვლის.
  • მათივე თქმით, ახლა გამაფრთხილებელ აქციას მართავენ და თუ არ მოუსმენენ, იძულებული იქნებიან, მიმართონ რადიკალურ ზომებს — სასწრაფოდ ნაწილობრივ გაჩერებას.

დეტალები: ექიმები განმარტავენ, რომ თუ არ იქნება ღირსეული ანაზღაურება, თავისთავად ვერ იქნება ევროპული ხარისხის ჯანდაცვა. აღნიშნავენ იმასაც, რომ დაბალი ხელფასები არამხოლოდ მათი, არამედ ზოგადად მედიცინის სფეროს პრობლემაა.

  • მათივე განმარტებით, ითხოვენ ეტაპობრივ მატებას, თუმცა უწყება ამას არარელევანტურად მიიჩნევს: "პირობითად შეიძლება იყოს 50% ახლა და შემდეგში გარკვეული პროცენტი მატება, მაგრამ ამაზე საერთოდ არ არის საუბარი, მატებაზე საერთოდ არ არის საუბარი. მხოლოდ ეს არის 10%-იანი დანაპირები, მომავალ წელს".
  • ერთ-ერთი ექიმი პუბლიკასთან აღნიშნავს, მისი 8-საათიანი სამუშაო დღის ანაზღაურება 50 ლარსაც კი არ შეადგენს, მომავალ წელს ხელფასის მატების შემთხვევაში, კი 55 ლარი გახდება.
  • "ნუ მიგვიყვანენ იქამდე, რომ მივიღოთ უკიდურესი ზომა — ვინც მორიგე არ იქნება სასწრაფოში დასაქმებული, ის გაიფიცება", — განაცხადა ჟურნალისტებთან ექიმმა.