ევროკომისიის საგარეო ქმედებათა სამსახურის განცხადებით, ევროკავშირი მთავარი არხის დამფუძნებლის, ნიკა გვარამიას საქმეს ყურადღებით აკვირდება.

რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებელი, ნიკა გვარამია დღეს, 2 ნოემბერს სააპელაციო სასამართლომ 3 წლითა და 6 თვით პატიმრობაში დატოვა.

  • გვარამია დამნაშავედ ცნეს უფლებამოსილების ბოროტად გამოყენებაში — ე.წ. რეკლამის გაყიდვისა და ავტომანქანის საქმეებზე.
  • NGO-ების განცხადებით, გვარამიას საქმე პოლიტიკურად მოტივირებულია. ომბუდსმენი კი უკიდურეს შეშფოთებას გამოხატავს.
  • აშშ-ის საელჩომ სააპელაციოს გადაწყვეტილება უკვე შეაფასა და თქვა, რომ გვარამიას პატიმრობა რისკის ქვეშ აყენებს ქართველი ხალხის მკაფიო არჩევანს.

დეტალები: მათი განცხადებით, ევროკავშირი ინდივიდუალური საქმეების შემადგენლობის შესახებ კომენტარს არ აკეთებს, მაგრამ აღნიშნავენ, რომ ამ საქმესთან დაკავშირებით დაისვა კითხვები, მათ შორის სახალხო დამცველის მხრიდან.

  • "შეგახსენებთ, რომ "უფრო ძლიერი ძალისხმევა თავისუფალი, პროფესიული, პლურალისტური და დამოუკიდებელი მედიაგარემოს უზრუნველსაყოფად, განსაკუთრებით იმისათვის, რომ მედიის მფლობელთა წინააღმდეგ მიმართული სისხლის სამართლებრივი პროცედურები აკმაყოფილებდეს უმაღლეს იურიდიულ სტანდარტებს" ევროკომისიის მიერ განსაზღვრულ ერთ-ერთ პრიორიტეტს წარმოადგენს";
  • საგარეო ქმედებათა სამსახურის თქმით, ევროკავშირი გააგრძელებს საქართველოს ხელისუფლების მხარდაჭერას სასამართლო სისტემის რეფორმაში, რის ფარგლებშიც ყურადღება გამახვილდება დამოუკიდებლობის, გამჭვირვალობისა და სასამართლო პროცედურების ხარისხზე, რომელიც კანონის უზენაესობის დასაცავად აუცილებელია;
  • "ევროკავშირი კვლავ სრულად მზად არის მხარი დაუჭიროს საქართველოს თორმეტი პრიორიტეტის შესრულებაში, რათა ქვეყანამ გაამართლოს თავისი მოქალაქეების იმედები ევროპულ მისწრაფებებთან დაკავშირებით", — ვკითხულობთ განცხადებაში.

შეწყალება: ოპოზიციის ნაწილმა უკვე საჯაროდ მოითხოვა პრეზიდენტისგან, შეიწყალოს ნიკა გვარამია. ენმ-ის თავმჯდომარის, ნიკა მელიას განცხადებით, თუ ზურაბიშვილის სიტყვები არ არის ლიტონი, თუ ნამდვილად სურს დეპოლარიზაცია და სამოქალაქო თანხმობის პროცესის რეალურად განხორციელება გადადგას ერთადერთი სწორი ნაბიჯი

  • "გამოიყენოს მისთვის კონსტიტუციით მინიჭებული უფლება და დაუბრუნოს თავისუფლება ნიკა გვარამიას", — ამბობს მელია.
  • ქართული ოცნების თავმჯდომარემ, ირაკლი კობახიძემ აღნიშნა, რომ თუ პრეზიდენტი შეიწყალებს გვარამიას, ეს იქნება პრეზიდენტის ინსტიტუტის შეურაცხყოფა.