კაცი, რომელმაც სინგაპურში ათობით ქალი მოატყუა, თითქოს ქალი გინეკოლოგი იყო, და სასქესო ორგანოს ფოტოები გააგზავნინა, ციხეში აღმოჩნდა.

ოთხშაბათს სასამართლომ 37 წლის მალაიზიელი ოი ჩუენ ვეი დამნაშავედ ცნო იდენტობის გაყალბებისთვის და 3 წლითა და 4 თვით თავისუფლების აღკვეთა მიუსაჯა.

სასამართლოს დოკუმენტებით, რომლებიც CNN-მა ნახა, ოი იყენებდა ყალბ Facebook-ის ანგარიშს, რათა დაკავშირებოდა ქალებს და თავიანთი სასქესო ორგანოებისა და სქესობრივი ცხოვრების შესახებ კითხვარის შევსება ეთხოვა.

ოთხი წლის განმავლობაში მან 38 ქალი მოატყუა და 1000-მდე ინტიმური ფოტო და ვიდეო მიიღო მათგან. მისი დანაშაული გასული წლის ივლისში გამოაშკარავდა, როცა ერთ-ერთმა ქალმა აღმოაჩინა, რომ ექიმი რეალურად არ არსებობდა და პოლიციას მიმართა.

პოლიციამ კაცის სახლი გაჩხრიკა და მტკიცებულებები ამოიღო. გამოძიების პროცესში, კაცმა აღიარა, რომ ხსენებულ ქალებს ატყუებდა.

სასამართლო პროცესზე პროკურორი ითხოვდა, ბრალდებულისთვის მინიმუმ სამი წელი და რვა თვე მიესაჯათ, ვინაიდან მას ადამიანების მოტყუების ძალიან ზუსტად შემუშავებული სქემა ჰქონდა და ძალიან დიდი ხნის განმავლობაში აგრძელებდა ამ დანაშაულის ჩადენას.

"ის თავს ქალ გინეკოლოგად ასაღებდა და მისი ტყუილის მსხვერპლებს სთხოვდა, ინტიმური ფოტოები და ვიდეოები გაეგზავნათ მისთვის. მან ექიმების მიმართ საზოგადოების ნდობა და სოციალური მედია თავისი დანაშაულის ჩასადენად ბოროტად გამოიყენა," — განაცხადა პროკურორმა.