რუსეთის უკრაინაში შეჭრიდან 8 თვის შემდეგ უკრაინისთვის მიყენებულმა ინფრასტრუქტურულმა ზარალმა $127 მილიარდს გადააჭარბა. კვლევას კიევის ეკონომიკური სკოლა ავრცელებს.

რატომ არის მნიშვნელოვანი: ადამიანური მსხვერპლის გარდა, ომმა ათასობით ადამიანი უსახლკაროდ და უსამსახუროდ დატოვა.

  • ეკონომიკის ომამდელ ნიშნულამდე აღდგენას წლები დასჭირდება.

კვლევის მიხედვით, ყველაზე მეტად საცხოვრებელი კორპუსები დაზარალდა.

  • ომმა მთლიანად ან ნაწილობრივ 135 000 კერძო სახლი და ბინა გაანადგურა.
  • მატერიალურმა დანაკარგმა, მთლიანი ზარალის 39.7% — $50.5 მილიარდი შეადგინა.

დეტალები: განადგურდა $25.3 მილიარდის საგზაო და სარკინიგზო ინფრასტრუქტურა. ასევე:

  • $9.9 მილიარდის ბიზნესი;
  • $7 მილიარდის საგანმანათლებლო დაწესებულებები;
  • $6.6 მილიარდის სოფლის მეურნეობის პროდუქცია,
  • $3.6 მილიარდის ენერგოინფრასტრუქტურა.

გარდა ამისა, კვლევის ავტორთა თქმით რეალური დანაკარგი გაცილებით მაღალია, რადგან მასში დროებით ოკუპირებულ რეგიონებში არსებული სიტუაცია სრულად არ არის ასახული.

  • პირდაპირი ზარალის გარდა, არსებობს ირიბი დანაკარგებიც — სამოქალაქო ავიაციისთვის უკრაინის ცა დაკეტილია, შეჩერებულია ინვესტიციები.
  • სხვადასხვა მონაცემით, სრულმა ზარალმა $500 მილიარდს ან $1 ტრილიონსაც კი გადააჭარბოს.
  • დახმარების ერთ-ერთ მსხვილ პაკეტად რუსეთისთვის გაყინული $300 მილიარდის უცხოური ვალუტის რეზერვის უკრაინისთვის გადაცემა მოიაზრება.