უკრაინის პრეზიდენტმა ვოლოდიმირ ზელენსკიმ ფრანკფურტის წიგნის ბაზრობაზე მყოფ საზოგადოებას მიმართა. თავის სიტყვაში ზელენსკიმ წიგნებისა და ცოდნის მნიშვნელობას გაუსვა ხაზი. ამასთან, მან ლიტერატორები უკრაინაში მიიწვია და სთხოვა, ქვეყნის ამჟამინდელი მდგომარეობა აღწერონ.

"ცოდნაა პასუხი მათთვის, ვისაც ეშინია, ვისაც არ სჯერა და ვინც მანიპულირებს", — განაცხადა ზელენსკიმ, — "წიგნები, დოკუმენტური ტექსტები, სტატიები, რეპორტაჟები — ესენია პასუხები. ყველას გიწვევთ უკრაინაში: გამომცემლებს, მწერლებს, ამ ინდუსტრიაში მომუშავე და გავლენიან ადამიანებს, პედაგოგებსა და ჟურნალისტებს. ყველას. ნახეთ, რა დღეშია ჩვენი ხალხი. რას მივაღწიეთ და რა გვემუქრება ჯერ კიდევ. საკუთარი თვალით ნახეთ ეს ყველაფერი და მოჰყევით".

უკრაინის პრეზიდენტის მიმართვას აუდიტორიამ ფეხზე წამომდგარმა დაუკრა ტაში.

სხვათა შორის, ზელენსკი ასევე შეეხო რუსეთისა და ირანის არყოფნას ფრანკფურტის წიგნის წლევანდელ ბაზრობაზე.

"ისინი ნაკლებად ჩართულნი არიან კულტურის სფეროში და მეტად — იქ, სადაც ყველაფერი ნადგურდება; არა მხოლოდ კულტურა, არამედ სიცოცხლეც და მისი საფუძველიც".

აღსანიშნავია, რომ ფრანკფურტის წიგნის ბაზრობამ რუსულ სახელმწიფო ინსტიტუტებთან თანამშრომლობა ომის დაწყებიდან მალევე, ჯერ კიდევ თებერვლის თვეში შეწყვიტა. ამ გადაწყვეტილებას წინ უძღოდა ბალტიისპირეთის ქვეყნებში გამომცემლების პროტესტი და მიმართვა რამდენიმე საერთაშორისო წიგნის ფესტივალის ორგანიზატორებისთვის. ამდენად, წლის ერთ-ერთ ყველაზე მნიშვნელოვან ლიტერატურულ ღონისძიებაზე რუსეთი წელს წარდგენილი არაა.

"ახლაც და მომავალშიც, უკრაინელ ლიტერატორებს უნდა ჰქონდეთ საშუალება, საკუთარი საქმიანობა და კულტურის პოპულარიზაცია განაგრძონ", — აცხადებს ევროპელ გამომცემელთა ფედერაცია, — "უკრაინული ლიტერატურისთვის ფრანკფურტის წიგნის ბაზრობაზე დიდი სტენდითა და უამრავი გამომცემლით წარმოდგენა შეუპოვრობის გამოვლინებაცაა, მათი ამ ძალისხმევის მხარდაჭერა და წიგნების პოპულარიზაცია კი ლიტერატურული სამყაროს ვალდებულებაა. ევროპელმა და მსოფლიო გამომცემლებმა მხარდაჭერა უკვე გამოხატეს, თუმცა, ეს მხოლოდ დასაწყისია. პროცესში სახელმწიფოებიც უნდა ჩაერთონ".

გვანცა ჯობავა, ქართველი გამომცემელი და გამომცემელთა საერთაშორისო ასოციაციის ვიცეპრეზიდენტი ფრანკფურტის წიგნის წლევანდელ ბაზრობაზე

ფოტო: Roger Tagholm / Publishing Perspectives

ფრანკფურტის წიგნის ბაზრობა, რომელიც მსოფლიოში ყველაზე მასშტაბური ლიტერატურული ფესტივალია, 1949 წლიდან ტარდება და მას ათიათასობით ადამიანი ესწრება. წიგნის წლევანდელი ბაზრობა 19-დან 23 ოქტომბრამდე იმართება.