უკრაინის პრეზიდენტის ვებგვერდზე გამოქვეყნდა ბრძანებები 726 და 727 — ორივე მათგანი ითვალისწინებს პერსონალური სპეციალური ეკონომიკური და სხვა შემზღუდავი ზომების (სანქციების) სიაში ცვლილებების შეტანას.

რატომ არის მნიშვნელოვანი: ბრძანებებს თან ახლავს დოკუმენტები, რომლებშიც ასეულობით ადამიანის სახელი და გვარი და მათთვის დაწესებული შეზღუდვის ფორმებია განხილული.

  • ერთ-ერთი ბრძანების ფაილებში ქართული ოცნების დამფუძნებლის ნათესავები: ძმა, ძმის ცოლი, დეიდაშვილი და დეიდასშვილის შვილი არიან.
  • სხვა ფაილებში კი შესაძლებელია რუსი ოლიგარქებისა და პროპაგანდისტების ნახვა.

დეტალები: უკრაინსკა პრავდას მონაცემებით, სანქციები შეეხო 1 374 კომპანიას, 256 რუს ბიზნესმენს და საოკუპაციო ადმინისტრაციის წარმომადგენლებს.

  • სიაში მოხვდა 2 ყველაზე ცნობილი რუსი პროპაგანდისტი, რასია 24-ის წამყვანები ოლგა სკაბეევა და დიმიტრი სოლოვიოვი.
  • ასევე, სამხედრო ორგანიზაცია ვაგნერის დამფუძნებელი, პუტინის პირად მზარეულად ცნობილი ევგენი პრიგოჟინი — შეგახენებთ, რომ ვაგნერი უკრაინაში საომარ მოქმედებებში მონაწილეობს.

სანქციები დაუწესდათ რუს ბიზნესმენებსაც. მათ შორის, რუსეთის ყველაზე მდიდარ ადამიანს, ვლადიმერ ლისინს.

  • სანქცირებულია ალფა ბანკის უფროსი, მიხაილ ფრიდმანიც, რომელიც Borjomi International-ის მფლობელიცაა.
  • ასევე, რომან აბრამოვიჩი — სამთო-მეტალურგიული ჰოლდინგ ევრაზის მეწილე და რუსეთ-უკრაინის მოლაპარაკებების მონაწილე, მიხაილ ვოევოდინი — როსტეხომის მფლობელი, ევგენი გინერი — VS Energy-ის ერთ-ერთი ბენეფიციარი და სხვები.

რა სანქციები დაუწესდათ: თითოეულ პირს ახლავს მოკლე დახასიათება და მისთვის დაწესებული შეზღუდვების სია, რომლებშიც აღნიშნულია:

  • დაებლოკებათ და დროებით წაერთმევათ მათ საკუთრებაში არსებული აქტივების გამოყენებისა და განკარგვის უფლება.
  • ასევე უკრაინის ტერიტორიაზე რესურსების ტრანზიტის, ფრენების და ტრანსპორტირების შეზღუდვა, ნაწილობრივი ან სრული შეწყვეტა;
  • ეკონომიკური და ფინანსური ვალდებულებების შესრულების შეჩერება;
  • ლიცენზიებისა და სხვა ნებართვების გაუქმება ან შეჩერება.