მსახიობმა ბრენდან ფრეიზერმა, რომელსაც დიდი პოპულარობა მუმიაში შესრულებულმა რიკის როლმა მოუტანა, ახლახან მიცემულ ინტერვიუში სწორედ ამ ფილმის შესახებ ისაუბრა. მსახიობის თქმით, მზად არის მუმია 4-ში მონაწილეობისთვის, თუ ამისი შესაძლებლობა ექნება.

ბრენდან ფრეიზერმა მუმიას პირველ სამ ფილმში მთავარი როლი შეასრულა. თუმცა 2017 წელს, როცა Universal Pictures-მა ფილმის კიდევ ერთი ვერსია გადაიღო, ფრეიზერისთვის როლი არ შეუთავაზებიათ. 2017 წლის მუმიაში მთავარ როლს ტომ კრუზი ასრულებს, რის შესახებაც ფრეიზერმა კომენტარი გააკეთა.

"ასეთი ფილმის გადაღება საკმაოდ რთულია. მთავარი "ინგრედიენტი", რომელიც მუმიაში ჩვენ გვქონდა და ამ ფილმში არ მინახავს ისაა, რომ სახალისო იყო. სწორედ ეს აკლია ახალ მუმიას და პირდაპირ საშინელებათა ჟანრს მიეკუთვნება. მუმია ამაღელვებელი უნდა იყოს, მაგრამ არა შემზარავი და საშინელი", — განაცხადა ბრენდან ფრეიზერმა.

შეგახსენებთ, რომ 1999 წელს სტივენ სომერსმა ერთ-ერთი ყველაზე წარმატებული სათავგადასავლო ფილმი მუმია გადაიღო. მუმიამ უამრავი ჯილდო მოიპოვა და პოპულარულიც მალევე გახდა, მოგვიანებით კი ბრენდან ფრეიზერის მონაწილეობით ფილმის კიდევ ორი ნაწილი გადაიღეს.