ირაკლი კობახიძემ პარლამენტში საკუთარი სიტყვა ქართული ოცნების ათწლიან მმართველობას მიუძღვნა და ტრადიციულად, არც პარტიის დამფუძნებლის, ბიძინა ივანიშვილის ხსენება დავიწყებია.

რატომ არის მნიშვნელოვანი: მმართველი პარტიის წევრები პოლიტიკად წასულ ბიძინა ივანიშვილს მადლობას მუდმივად უხდიან და მის მიმართ ქება-დიდებას არ იშურებენ.

• ეს არც პირველი და დიდი ალბათობით, არც ბოლო შემთხვევაა, როცა "ოცნების" დეპუტატები საპარლამენტო ტრიბუნას ყოფილი პრემიერის სადიდებლად იყენებენ.

დეტალები: კობახიძე თქვა, რომ ათი წლის წინ ქართულმა ოცნებამ ივანიშვილის ხელმძღვანელობით გადამწყვეტი გამარჯვება მოიპოვა.

• არც წინა ხელისუფლების მმართველობის კრიტიკა გამორჩენია და თქვა, რომ 2012 წლამდე ადამიანის ღირსება და უფლებები შელახული, კონსტიტუცია დამახინჯებული, სასამართლო მართული, ხოლო მედიაგარემო მონოპოლიზებული იყო.
• "მათ პერიოდში მოხდა აფხაზეთისა და ე.წ სამხრეთ ოსეთის ე.წ დამოუკიდებლობის აღიარება, გაჩერდა წინსვლა დასავლური ინტეგრაციის მიმართულებით".
• შემდეგ კი დასძინა, რომ სწორედ ესენია მთავარი მიზეზი იმისა, რომ ენმ 2012 წლის შემდეგ ვერცერთ არჩევნებში ვერ იმარჯვებს.

ამის შემდეგ აღნიშნა, რომ სწორედ ასეთი სიტუაცია დახვდათ, როდესაც ხელისუფლებაში მოვიდნენ და ქართული ოცნების "ღვაწლზე" დაიწყო საუბარი.

• განაცხადა, რომ 2012 წლის შემდეგ, როგორც დემოკრატიული განვითარების, ასევე, ყველა სხვა სფეროში ფუნდამენტური გარდატეხა მოხდა.
• მისი თქმით, შემცირდა სიღარიბე, აღმოიფხვრა ადამიანის ღირსებისა და უფლებების შელახვის პრაქტიკა, ბიზნესის რეკეტი.
• პარტიის ღვაწლს მიაწერა ისიც, რომ 2012 წლიდან ქვეყანაში მედიაპლურალიზმი დამკვიდრდა.

კობახიძის მტკიცებით, მათი ხელისუფლებაში მოსვლის შემდეგ საქართველოში გავლენების გაფართოებისა და ოკუპაციის კუთხით რუსეთის წინსვლა მთლიანად გაჩერდა.

• "ჩვენ გვქონდა მშვიდობის ათი წელიწადი და სუვერენიტეტის ათი წელიწადი".
• "პატივს ვცემთ ყველა პარტნიორს, მაგრამ ვიღებთ გადაწყვეტილებებს ჩვენი ქვეყნისა და ხალხის საუკეთესო ინტერესების შესაბამისად, და სწორედ ასე გაგრძელდება პოლიტიკის წარმოება".

ბოლოს კი სიტყვით გამოსვლა ისევ ბიძინა ივანიშვილის ხსენებით და მადლობით დაასრულა.

• "კიდევ ერთხელ გადავუხდი მადლობას ბატონ ბიძინა ივანიშვილის, იმ გარდატეხაში შეტანილი წვლილისთვის, რომელიც ათი წლის წინ მივიღეთ ჩვენს ქვეყანაში".
• "გვჯერა, ქართული ოცნება მალე აუცილებლად ახდება, კეთილდღეობა შევა თითოეულ ოჯახში".

არმაზ ახვლედიანის განცხადებით, მისთვის მოულოდნელი იყო, რომ მმართველი პარტიის ხელმძღვანელი ხელისუფლებაში მოსვლის 10 წლის თავზე ისაუბრებდა.

• "იქნებ მე გამომრჩა, კიდევ ერთხელ ყურადღებით მოვისმენდი თქვენს გამოსვლას, ბატონო ირაკლი, მაგრამ თითქოს ვერ მოვისმინე ვერაფერი პრობლემებზე".