კრივის ფედერაციის პრეზიდენტმა, დავით წიკლაურმა კულტურის მინისტრის, თეა წულუკიანის ბრალდებები კიდევ ერთხელ უარყო.

რატომ არის მნიშვნელოვანი: 22 სექტემბერს პარლამენტში თეა წულუკიანმა თქვა, რომ მას, როგორც ქალ მინისტრს, სპორტის ფედერაციებთან ქალთა უფლების კუთხით ბევრი პრობლემა აქვს.

  • მანვე აღნიშნა, რომ სპორტში ძალადობა სერიოზული პრობლემაა და ამაზე სამუშაოა;
  • შემდეგ მან საზოგადოებრივი მაუწყებლის ეთერში განაცხადა, რომ კონკრეტული ფედერაციის პრეზიდენტმა გადაწყვიტა, მისთვის ხელი დაერტყა, მაგრამ არ დაუკონკრეტებია, ვინ;
  • 28 სექტემბერს იმედის ეთერში კი თქვა, რომ ეს კრივის ფედერაციის ხელმძღვანელი იყო.

დეტალები: წიკლაური მთავარი არხის ეთერში წულუკიანთან შეხვედრის დეტალებს იხსენებს და ამტკიცებს, რომ სიტყვიერი შეურაცხყოფა თავდაპირველად თავად წულუკიანმა მიაყენა. მისი თქმით, შეხვედრას, ასევე, ესწრებოდა წულუკიანის მოადგილე, სოსო გიორგაძეც.

  • მისი თქმით, წულუკიანს დარჩენილი ჩემპიონატების შესახებ მიაწოდა ინფორმაცია და ბოლოს სთხოვა, გადაეხედა იმ მწვრთნელებისა და სპორტსმენების ხელფასებისთვის, რომლებმაც საპრიზო ადგილები დაიკავეს ან ჩემპიონები გახდნენ;
  • "ასე ვზივარ, თავი მაქვს დახრილი და უცებ, "მორჩიო?", დიახ-მეთქი და "შე, უზრდელო, თავხედო. ახლა აეთრიე აქედან, გაეთრიე, ზრდილობას რომ ისწავლი, მერე მოეთრევი, მოხვალ აქ და ბოდიშს მოიხდიო". ისე დავიბენი, მე მეგონა, სოსოს ეუბნებოდა";
  • წიკლაური ამბობს, რომ ამის შემდეგ დიდ დარბაზში გადავიდნენ, სადაც სპორტსმენები ინტერვიუების ჩასაწერად ემზადებოდნენ, რა დროსაც წულუკიანს უთხრა: "ქალბატონო თეა, არ გრცხვენიათ, რას კადრულობთ-მეთქი, ეს არის თქვენი პატივისცემა სპორტსმენებისა და სპორტის მიმართ-მეთქი?".

წიკლაური ამტკიცებს, რომ წულუკიანმა სიტყვიერი შეურაცხყოფა ამ დარბაზშიც მიაყენა და ყველას თანდასწრებით უთხრა: "დაახვიე აქედან, შენ რას გიზამ, არ იციო".

  • "ამ სიტყვების მერე მივუტრიალდი და "შენ მართლა უზრდელო, თავხედო ქალო-მეთქი. არ გრცხვენია მინისტრი რეებს კადრულობ, ეს არის თქვენი პატივისცემა-მეთქი?", — ამბობს წიკლაური;
  • "ამ დროს ბატონი სოსო გიორგაძე [მეუბნება]: "შენ, ბიჭო, რას გიზამ". ეს რომ წამოვიდა ჩემკენ, მივუბრუნდი ბატონ სოსოს და თავისი საკადრისი პასუხი გავეცი, ოღონდ, რა თქმა უნდა, ცოტა უფრო ცუდი სიტყვებით. ქალბატონ თეაზე არ მიკადრებია არაფერი";
  • "არანაირად, ერთი წამითაც არ გამივლია თავში, რომ მეძალადა, მაგრამ მე რომ მასზე პასუხი არ გამეცა, მე იქიდან ასე ვერ გამოვიდოდი და არ გამოვიდოდი".