თარიღი: 2 ოქტომბერი, 2022

საათი: 12:00 -18:00

ადგილი: ვარკეთილის საფეხბურთო ცენტრი

გაეროს მოსახლეობის ფონდის (UNFPA) საქართველოს ოფისის, არასამთავრობო ორგანიზაცია Care Together-ისა და საქართველოს ფეხბურთის ფედერაციის ინიციატივით, კამპანიის "კაცები ზრუნავენ" ფარგლებში, ვარკეთილის საფეხბურთო ცენტრში მამებისა და შვილების საფეხბურთო ტურნირი — მამების თასი წელს მეოთხედ გაიმართება. ტურნირს გახსნიან: გაეროს მოსახლეობის ფონდის (UNFPA) წარმომადგენელი თურქეთში და საქართველოს ოფისის დირექტორი, ჰასან მოჰთაშამი, შვედეთის ელჩი საქართველოში, ულრიკ ტიდესტრომი და საქართველოს ფეხბურთის ფედერაციის პრეზიდენტი, ლევან კობიაშვილი.

მამების თასი 2017 წელს, გაეროს მოსახლეობის ფონდისა და საქართველოს ფეხბურთის ფედერაციის პარტნიორობის ფარგლებში დაარსდა და წლიდან წლამდე მის მიმართ მამებისა და შვილების ინტერესი მკვეთრად გაიზარდა. Covid19-ის პანდემიის გამო, ტურნირი 2020-2021 წლებში ვერ ჩატარდა. 2022 წელს, ორწლიანი პაუზის შემდეგ, მამების თასი გუნდებს კვლავ უმასპინძლებს.

წელს მამების თასში მონაწილეობას 24 გუნდი მიიღებს. თითოეული გუნდი უნდა შედგებოდეს 8-12 წლის, მინიმუმ ოთხი და მაქსიმუმ ექვსი მონაწილისგან: ორი გოგო და ორი ბიჭი (შესაძლებელია, გუნდს ორი დამატებითი მოთამაშე ჰყავდეს რეზერვში), ხოლო გუნდის მწვრთნელი აუცილებლად ერთ-ერთის მამა უნდა იყოს.

ტურნირში მონაწილეობა უფასოა. მამების თასის ყველა მონაწილეს გადაეცემა სამახსოვრო მაისურები, გამარჯვებულ სამ გუნდს კი ბავშვთა გასართობი ცენტრის ვაუჩერები. ტურნირის ჩემპიონი სპეციალურ თასს მიიღებს.

ღონისძიების მიზანია, კიდევ ერთხელ გაუსვას ხაზი შვილების ცხოვრებაში მამების ჩართულობისა და სპორტში ბიჭებისა და გოგოების თანაბარი მონაწილეობის მნიშვნელობას.

ღონისძიება ტარდება გაეროს ერთობლივი პროგრამის "გენდერული თანასწორობისათვის" ფარგლებში, რომელიც ხორციელდება შვედეთის მთავრობის ფინანსური ხელშეწყობით.

კამპანიის შესახებ:

კამპანია "კაცები ზრუნავენ" ხორციელდება გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია Care Together-ის მიერ, შვედეთის მთავრობისა და ევროკავშირის ფინანსური მხარდაჭერით.

კამპანიის "კაცები ზრუნავენ" მიზანია, წაახალისოს კაცების, როგორც მზრუნველი მამებისა და მეუღლეების ჩართულობა ოჯახების ჯანმრთელობისა და კეთილდღეობისათვის, რათა კაცებმა მეტად დაუჭირონ მხარი გენდერულ თანასწორობას და ამ გზით — ქალების სოციალურ და ეკონომიურ მონაწილეობასა და საზოგადოების გაძლიერებას. კამპანიაში მონაწილეობა შეუძლია ყველა კაცს, რომელიც მის იდეას იზიარებს.

საკონტაქტო პირი: სალომე ბენიძე, გაეროს მოსახლეობის ფონდის (UNFPA) კომუნიკაციის და პარტნიორობის ანალიტიკოსი.

+995 577 211 300

[email protected]