უელსში პატარძალმა, რომლის საქმროც საკურთხეველთან არ გამოჩნდა, გადაწყვიტა, რომ ქორწილში დაპატიჟებულ სტუმრებთან ერთად კარგი დრო გაეტარებინა. კეილი სტედის თქმით, არ სურდა, რომ ძვირადღირებული საღამო ჩაშლილიყო, ამიტომ ახლობელი ადამიანების გარემოცვაში კარგად მოილხინა.

კეილის თქმით, საქმროს 4 წლის განმავლობაში ხვდებოდა და დაქორწინებაც დიდი ხნით ადრე დაგეგმეს, თუმცა მისი ყოფილი პარტნიორი ქორწილის დღეს არ გამოჩნდა. "ჩემი საქმრო ქორწილის წინა დღეს, დაახლოებით 4 საათზე ვნახე, ამის შემდეგ კი მისგან არაფერი მსმენია. ჩვენ მასთან დაკავშირება ვცადეთ, მაგრამ არანაირი პასუხი არ მიგვიღია და არც მიზეზი ვიცი. მის საქციელს ვერანაირ ახსნას ვერ ვუძებნი", — განაცხადა კეილიმ.

ფოტო: Instagram

პატარძალმა საქმროს გარეშე ფოტოსესიაში მიიღო მონაწილეობა, ოჯახის წევრებთან ერთად ბევრი იცეკვა და საქორწინო ტორტიც დაჭრა. მეჯვარეებთან ერთად კი ლიზოს სიმღერა Good as Hell შეასრულა.

ფოტო: Instagram

პატარძალმა თავისი ყოფილი საქმრო 2018 წელს გაიცნო, ხოლო დაქორწინება 2020 წელს გადაწყვიტეს. "არ მინდოდა, რომ ეს დღე მწუხარებით გამეხსენებინა. თავიდან ჩემი მეგობრები უხერხულ სიტუაციაში აღმოჩნდნენ, მაგრამ ჩემთან ერთად დარჩნენ. იმდენი განსაკუთრებული და დასამახსოვრებელი მომენტი გვქონდა, რომ ეს დღე მაინც ბედნიერ მოგონებას უკავშირდება", — განაცხადა კეილიმ.