ქართული ოცნების წარმომადგენლებმა, დეპუტატმა, ირაკლი ზარქუამ და თბილისის მერმა, კახა კალაძემ IDFI-ს ანგარიშთან დაკავშირებით გააკეთეს კომენტარები.

რატომ არის მნიშვნელოვანი: ანგარიშის მიხედვით, 2018-2022 წლებში საქართველოს მოქალაქეობა 8 464-მა ადამიანმა მიიღო, აქედან 72% რუსეთის მოქალაქე იყო.

  • მათივე ცნობით, რუსეთის უკრაინაში შეჭრის შემდეგ საქართველოს მოქალაქეობა საგამონაკლისო წესით რუსეთის 551, ხოლო უკრაინის 8 მოქალაქეს მიენიჭა.

რას ამბობს "ოცნება": ზარქუა აცხადებს, რომ იმ რუსეთის მოქალაქეების დიდი ნაწილი, ვინც ბოლო რამდენიმე წელიწადში საქართველოს მოქალაქეობა მიიღო, ეთნიკურად ქართველია, რომელიც რუსეთის ფედერაციაში ცხოვრობდნენ.

  • "მათ მიიღეს გადაწყვეტილება, რომ დაეტოვებინათ რუსეთის მოქალაქეობა და დაუბრუნდნენ თავიანთ სამშობლოს", — ამბობს ის.
  • კალაძე მოცემულ რიცხვს იმით ხსნის, რომ თითოეული ადამიანი მოქალაქეობის მიღებამდე შემოწმებას გადის.

რას ამბობს ოპოზიცია: პარტია საქართველოსთვის ერთ-ერთი ლიდერის, ანა ბუჩუკურის შეფასებით, სახეზეა სურათი, როდესაც "რუსეთის მოქალაქეები მორბიან ქვეყანაში, საქართველოს მოქალაქეები კი გარბიან".

  • პარტია დროას თავმჯდომარის, ელენე ხოშტარიას თქმით, იმ საფარქვეშ, თითქოს ტურისტები შემოდიან, რეგისტრირდებიან რუსული ბიზნესები.
  • "ოკუპანტ ქვეყანას ვაძლევთ ფორმალურ იარაღს ჩვენს ქვეყანაზე გავლენის მოხდენის", — ამბობს ის.