საქართველოში კვლავ მაღალი ინფლაციაა. აგვისტოს მდგომარეობით, ფასების საშუალო დონე წლიურად 10,9%-ით არის გაზრდილი.

რატომ არის მნიშვნელოვანი: ბოლო მონაცემებით, ინფლაციის მაჩვენებელზე ყველაზე დიდი გავლენა სურსათის, ტრანსპორტის, სასტუმროების, კაფეებისა და რესტორნების გაძვირებამ მოახდინა.

  • იმის გათვალისწინებით, რომ საქართველოს მოსახლეობის დიდი ნაწილისთვის ხარჯების ძირითადი ნაწილი სურსათზე მოდის, ინფლაცია მათთვის მნიშვნელოვანი პრობლემის შემქმნელია.

დეტალები: საქსტატის ინფორმაციით, ბოლო ერთი წლის ჭრილში სურსათისა და უალკოჰოლო სასმელების ჯგუფში პროდუქცია 15,8%-ით არის გაძვირებული.

  • ტრანსპორტის ჯგუფში — 15,6%-ით;
  • საცხოვრებლის, წყლის, ელ.ენერგიის და აირის ჯგუფში — 12,4%-ით;
  • სასტუმროების, კაფეების და რესტორნების ჯგუფში — 14,9%-ით.

ვრცლად: წლიურად ყველაზე მეტად გაძვირებული პროდუქტის ჩამონათვალი ასეთია:

  • პური და პურპროდუქტები — გაძვირდა 32,4%-ით;
  • რძე, ყველი და კვერცხი — გაძვირდა 20,8%-ით;
  • მინერალური და წყაროს წყალი, უალკოჰოლო სასმელები და ნატურალური წვენები — გაძვირდა 20,3%-ით;
  • ზეთი და ცხიმი — 19,8%-ით.

გარდა ამისა, წლიურად, ყველაზე მეტად გაძვირებულია ყავა, ჩაი და კაკაო — 18,7%-ით.

  • შაქარი, ჯემი და სხვა ტკბილეული — 18,6%-ით.
  • თევზეული — 13,6%-ით;
  • ხორცი და ხორცის პროდუქტები — 11,1%-ით;
  • ხილი და ყურძენი — 2,5%-ით;
  • ამასთან, ფასები შემცირდა ბოსტნეულსა და ბაღჩეულზე — 9,6%-ით.

სტრიქონებს შორის: მაღალი ინფლაციის საპასუხოდ, ეროვნული ბანკი მონეტარულ პოლიტიკას გამკაცრებულ რეჟიმში ტოვებს, რაც რეფინანსირების განაკვეთის მაღალ ნიშნულზე, 11%-ზე შენარჩუნებით გამოიხატება.

  • რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს.

  • როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ.

  • გაძვირებული სესხების პირობებში ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.

ფართო სურათში: ეროვნულ ბანკში ამბობენ, რომ უკრაინის მიმართ აგრესიის საპასუხოდ რუსეთისთვის დაწესებულმა სანქციებმა და მიწოდების შეფერხებამ მსოფლიო ბაზრებზე საკვები პროდუქტები, ნედლეული და ენერგორესურსები მნიშვნელოვნად გააძვირა.

  • საქართველოში გაზრდილია რუსეთიდან, ბელარუსიდან და უკრაინიდან გაზრდილი ხანგრძლივვადიანი ვიზიტები, რამაც ადგილობრივ ბაზარზე ბინის ქირა მკვეთრად და მყისიერად გაზარდა — სებ-ის შეფასებით ინფლაციაზე გავლენა ამანაც მოახდინა.
  • "მონეტარული პოლიტიკა გამკაცრებული დარჩება მანამ, სანამ ინფლაციურ მოლოდინებზე ზრდის მიმართულებით არსებული რისკები საკმარისად არ შერბილდება".
  • ეროვნული ბანკის მიზანია, ინფლაცია მიზნობრივ მაჩვენებელს, 3%-ს დაუახლოვოს.