HBO-ს პოპულარული თინეიჯერული დრამა ეიფორია მესამე სეზონით ბარბი ფერეირას გარეშე დაბრუნდება. ბარბი სერიალში ერთ-ერთ მთავარ პერსონაჟს, კეტს განასახიერებდა. ბარბიმ წასვლის შესახებ ფანებს ინსტაგრამზე შეატყობინა:

"4 წლის განმავლობაში ყველაზე განსაკუთრებული და იდუმალი პერსონაჟის, კეტის განსახიერების შემდეგ ცრემლებით მიწევს გამომშვიდობება. იმედი მაქვს, ბევრმა თქვენგანმა დაინახა მასში საკუთარი თავი, როგორც მე დავინახე და ბედნიერები იყავით მისი მოგზაურობის ყურებით. მასში ჩემი მზრუნველობა და სიყვარული ჩავაქსოვე და იმედი მაქვს, ეს იგრძენით. მიყვარხარ, კეტრინ ჰერნანდეზ", — დაწერა ბარბიმ.

ფოტო: Instagram

მიუხედავად იმისა, რომ სერიალის პირველ სეზონში კეტს სხვა მთავარი პერსონაჟებივით დიდი დრო ეთმობოდა, მეორე სეზონში მას საკმაოდ პატარა როლი ჰქონდა. ფანები პერსონაჟის განვითარებითაც უკმაყოფილონი დარჩნენ — მეორე სეზონში კეტი მხოლოდ თავისი შეყვარებულისგან თავის დახსნას ცდილობს, შემდეგ კი ძალიან უცნაური საბაბით შორდება.

აღსანიშნავია, რომ ჯერ კიდევ თებერვალში გავრცელდა ჭორები ბარბი ფერეირასა და სერიალის შემქმნელის, სემ ლევინსონს შორის განხეთქილების შესახებ. გავრცელებული ინფორმაციით, ერთხელ გაბრაზებული ბარბი გადასაღები მოედნიდანაც კი წავიდა. წყაროების თქმით, სხვა მსახიობებიც უკმაყოფილო იყვნენ სამუშაო პირობებით — გადატვირთული რეჟიმით, ხანმოკლე შესვენებებითა და ცუდი საკვებით. HBO-მ ბრალდებები უარყო.

სემ ლევინსონთან დაპირისპირების შესახებ ინფორმაცია ბარბიმაც უარყო. მისი თქმით, გავრცელებული ჭორების უმეტესობა ტყუილი იყო, თუმცა ეს ყველაფერი უბრალოდ ფანების ენთუზიაზმსა და სიყვარულს მიაწერა.