უკრაინის პროკურატურამ დაშავებული და დაღუპული ბავშვების შესახებ ინფორმაცია განაახლა. თუმცა მონაცემები საბოლოო არ არის, რადგან დაბომბვის ადგილების შემოწმება აქტიური საომარი მოქმედებების ზონებში და დროებით ოკუპირებულ ტერიტორიებზე ვერ ხერხდება.

რატომ არის მნიშვნელოვანი: პუტინის გაუმართლებელ ომს, რომელიც თითქოსდა დემილიტარიზაციას ემსახურება, მშვიდობიანი მოქალაქეები, მათ შორის, ბავშვებიც ეწირებიან.

  • რუსებმა არაერთხელ დაბომბეს დასახლებები, ევაკუაციის სივრცეები და თავშესაფრები, წარწერით "ბავშვები".
  • ეს კიდევ ერთხელ უსვამს ხაზს ოკუპანტების სისასტიკეს და იმას, რომ პუტინი საკუთარი მიზნების მისაღწევად არაფერს ერიდება.

რიცხვებში: ომის დაწყებიდან დღემდე 373 ბავშვი დაიღუპა, 721-ზე მეტი ბავშვი დაშავდა, მათ შორის:

  • დონეცკის ოლქში — 387;
  • ხარკოვის ოლქში — 202;
  • კიევის ოლქში — 116;
  • ჩერნიგოვის ოლქში — 68.

დეტალები: პროკურატურის განცხადებით, 20 აგვისტოს ოკუპანტების მიერ ნიკოლაევის ოლქში საცხოვრებელი ინფრასტრუქტურის დაბომბვის შედეგად მძიმედ დაშავდა 3-დან 8 წლამდე ასაკის სამი ბავშვი.

  • გარდა ამისა, უწყების ინფორმაციით, მარიუპოლში ოკუპანტების მიერ ჩადენილი სამხედრო დანაშაულების აღრიცხვის დროს 1-დან 17 წლამდე ასაკის კიდევ 10 ბავშვის დაღუპვის შესახებ გახდა ცნობილი.

გაეროს განცხადებით, ომი დამანგრეველ გავლენას ახდენს უკრაინის 7,5 მილიონ ბავშვზე.

  • ორგანიზაციის მონაცემებით, უკრაინელ ლტოლვილთა რიცხვი 11 მილიონს გადასცდა.