საზოგადოებრივი წესრიგის დარღვევის რამდენიმე ფაქტის შემდეგ ეზრა მილერმა ბოდიში საჯაროდ მოიხადა. მსახიობი წესრიგის დარღვევისთვის თვეების წინ რამდენჯერმე დააპატიმრეს. ახლახან მიცემულ ინტერვიუში კი მილერმა განაცხადა, რომ მენტალური ჯანმრთელობის პრობლემები აქვს და უკვე მკურნალობის პროცესშია.

"ინტენსიური კრიზისის პერიოდი გავიარე და გავაანალიზე, რომ მენტალური ჯანმრთელობის ძალიან რთული პრობლემები მაქვს, ახლა კი მკურნალობა დავიწყე. მინდა, ბოდიში მოვუხადო ყველას, ვისაც ჩემი ბოლოდროინდელი ქცევებით ვაწყენინე. მზად ვარ, ყველაფერი გავაკეთო, რათა ჯანსაღ, უსაფრთხო და პროდუქტიულ ცხოვრებას დავუბრუნდე", — განაცხადა ეზრა მილერმა.

შეგახსენებთ, რომ ეზრა მილერი საზოგადოებრივი წესრიგის დარღვევისთვის რამდენიმე თვის წინ ჰავაიში დააკავეს. ჩვენებების მიხედვით, მილერი ბარში მყოფ ადამიანებს უცენზურო სიტყვებით მიმართავდა, ერთ ქალს კარაოკეზე სიმღერის დროს მიკროფონი ხელიდან გამოგლიჯა, შემდეგ კი უცნობ კაცსაც დაუპირისპირდა. პოლიციის ინფორმაციით, ბარის თანამშრომლებმა მსახიობს რამდენჯერმე მოუწოდეს, დამშვიდებულიყო, თუმცა უშედეგოდ.

ამ თვის დასაწყისში მილერს ბრალი ქურდობაშიც დასდეს. მას ვერმონტის შტატის ერთ-ერთი ალკოჰოლური მაღაზიიდან ღვინის ბოთლების მოპარვაში ადანაშაულებდნენ. მიუხედავად ბრალდებებისა, Warner Bros-მა განაცხადა, რომ მილერის მონაწილეობით ფილმი The Flash მომავალ ზაფხულს ეკრანებზე გამოვა.