ამერიკული Domino's Pizza-სთვის იტალიურ ბაზარზე წარმატების მიღწევა იმაზე რთული აღმოჩნდა, ვიდრე ეს ერთი შეხედვით ჩანდა. იტალიაში 7-წლიანი მუშაობის შემდეგ Domino's Pizza-მ ქვეყანაში ყველა რესტორანი დახურა.თუმცა ამის მიზეზი ის არ არის, რომ იტალიელები უპირატესობას ადგილობრივი პიცის რესტორნებს ანიჭებენ.

Domino's Pizza-ს ფინანსური პრობლემები პანდემიის დროს დაეწყო, როცა დიდი ხნის გამავლობაში რესტორნები დახურული იყო და გაყიდვა მხოლოდ მიტანის სერვისით ხდებოდა. აპლიკაცია, რომელსაც Domino's Pizza თავისი პროდუქციის ონლაინ რეჟიმში გასაყიდად იყენებდა, EPizza იყო. პიცის ადგილობრივ რესტორნებს კი ისეთ აპლიკაციებთან ჰქონდათ ხელშეკრულება, როგორებიცაა Glovo, Just Eat და Deliveroo, რომლებთანაც კონკურენციის გაწევა რთული აღმოჩნდა.

Domino's Pizza-ს განცხადებით, EPizza პანდემიის პერიოდში ხარვეზებით მუშაობდა, რის გამოც პიცის მიწოდება დროულად არ ხდებოდა. თუმცა პანდემიის დასრულებისა და შეზღუდვების მოხსნის შემდეგ, პრობლემები არ გამოსწორებულა. Domino's Pizza-მ კი 2015 წელს, როცა იტალიის ბაზარზე დაიწყო გაყიდვები, EPizza-თან 10-წლიანი ხელშეკრულება გააფორმა.

2015 წლიდან მოყოლებული Domino's Pizza-მ იტალიაში 29 ფილიალი გახსნა. 2030 წლისთვის კი კომპანია გეგმავდა, რომ ქვეყნის მასშტაბით 880 ფილიალი გაეხსნა. რაც შეეხება ფასს, ადგილობრივ რესტორნებთან შედარებით Domino's Pizza ძვირი არ იყო. ამ ეტაპზე კი იტალიაში Domino's Pizza-ს ყველა რესტორანი დახურულია.