19 წლის ფლორიდელი აქტივისტი, ოლივია ჯულიანა, რომელიც აბორტის უფლებისთვის იბრძვის, კიბერბულინგისა და დაცინვის სამიზნედ იქცა. ეს, არც მეტი, არც ნაკლები პოლიტიკოსის — რესპუბლიკელი მეთ გეიტცის — "დამსახურებით" მოხდა, რომელმაც ჯულიანას ფოტო სოციალურ ქსელში განათავსა და დამამცირებელი განცხადებაც მიაყოლა. თუმცა, თინეიჯერს ამაზე დიდად არ უდარდია — მეტიც, პოლიტიკოსის ქმედებამ საპირისპირო შედეგი გამოიღო, ხალხმა ოლივიასადმი მხარდაჭერა გამოხატა და გოგომ მხოლოდ 48 საათში $275 ათასზე მეტი შეაგროვა აბორტის უფლების ხელშესაწყობად.

ყველაფერი იმით დაიწყო, რომ მაიამიში მცხოვრებმა ოლივიამ გეიტცი ულტრამემარჯვენეთა ორგანიზებულ შეხვედრაზე გაკეთებული სექსისტური და მიზოგინიური განცხადებების გამო გააკრიტიკა.

"ქალები, რომლებიც ყველაზე ნაკლებსავარაუდოა, რომ დაორსულდნენ, აბორტზე ყველაზე მეტად დარდობენ", — განაცხადა რესპუბლიკელმა პოლიტიკოსმა, — "არავინ მოისურვებს შენს დაორსულებას, თუკი ცერა თითს გავხარ. ეს ხალხი შინაგანადაც და გარეგნულადაც ამაზრზენია. სიმაღლეში 1,5 მეტრი არიან და 150 კილოგრამს იწონიან".

მას შემდეგ, რაც ეს განცხადება ჯულიანამ გააკრიტიკა, გეიტცმა ტვიტერზე თავის მილიონზე მეტ გამომწერს თინეიჯერის ფოტო გაუზიარა და განაცხადა, ბრაზი გამომიწვევიაო. ტვიტი მან იმ სტატიასთან ერთად გამოაქვეყნა, სადაც მისი შეურაცხმყოფელ განცხადებებზე იყო საუბარი.

19 წლის აქტივისტს მომხდარის შესახებ მეგობრებმა შეატყობინეს.

"მის მიმართ კრიტიკულად განწყობილი ვიყავი, მერე კი მან ტვიტერზე ჩემი ფოტო განათავსა. გავოგნდი", — ჰყვება ოლივია და დასძენს, რომ ამაზე არ გაბრაზებულა, — "სიმართლე გითხრათ, გამეცინა. ვიფიქრე, ეს გამომადგება-მეთქი".

საბოლოოდ, ჯულიანამ პოლიტიკოსის ქმედება მართლაც თავისი საქმისთვის სასარგებლოდ გამოიყენა და ახალგაზრდა აქტივისტების ჯგუფისთვის თანხის შეგროვება წამოიწყო. რამდენიმე საათში ოლივიამ უკვე ასიათასობით დოლარი შეაგროვა. ამ თანხის გამოყენებას აქტივისტები აბორტის უფლების მხარდასაჭერად აპირებენ.

"ხალხი ფიქრობს, რომ რადგან თინეიჯერი ვარ, გულუბრყვილო ან მგრძნობიარე ვარ, მაგრამ მე ეს მართლაც შესაძლებლობად აღვიქვი", — აღნიშნავს ჯულიანა.

სხვათა შორის, ამ შესაძლებლობისთვის ახალგაზრდა აქტივისტმა გეიტცს თავადვე გადაუხადა მადლობა ტვიტერზე და ღია ბარათიც მიუძღვნა.

რაც შეეხება თვითონ გეიტცს, მას ახლა ალბათ სხვა პრობლემები აქვს — გამოძიება მიმდინარეობს იმის დასადგენად, ჰქონდა თუ არა რესპუბლიკელ პოლიტიკოსს სექსუალური ურთიერთობა არასრულწლოვანთან.

შეგახსენებთ, რომ რამდენიმე კვირის წინ აშშ-ის უზენაესმა სასამართლომ გააუქმა 1973 წლის გადაწყვეტილება, რომელიც ქალებს საკუთარი ნებით აბორტის გაკეთების კონსტიტუციურ უფლებას აძლევდა. გადაწყვეტილებას ქვეყანაში მასობრივი პროტესტი მოჰყვა, მათ შორის, ცნობილი ადამიანებისგან.

ასევე იხილეთ: