On.ge სააგენტოსთან დაკავშირებას ცდილობს, მაგრამ ვერ ახერხებს. მათ პასუხს მიღებისთანავე შემოგთავაზებთ.

დეტალები: თომა ლიპარტიანი Facebook-ზე წერს, რომ რელიგიის საკითხთა სახელმწიფო სააგენტოს სამართლებრივი უზრუნველყოფის სამსახურის ხელმძღვანელმა, ავთანდილ კვერნაძემ დაურეკა და უთხრა, რომ მასთან გაცნობითი ხასიათის შეხვედრა სააგენტოს თავმჯდომარეს, ზაზა ვაშაყმაძეს სურდა.

• მისი თქმით, დრო არ შეუთანხმეს და პირდაპირ დაიბარეს ოფისში, რაც არ მოეწონა, მაგრამ დათანხმდა.
• ამბობს, რომ ამ დროს ვიზიტით ჩამოდიოდა მღვდელი, რომლის ზედამხედველობის ქვეშაც ახორციელებს უფლებამოსილებას და შეხვედრაზე მისი წაყვანაც შესთავაზა.
• "ამაზე მპასუხობს რომ "ბატონი ზაზა მხოლოდ თქვენ გიბარებთ და მღვდელი ნახევარი საათით სახლში დატოვეო" (არ მოგესმათ, მღვდელზე მეუბნება რომ შინაური ცხოველივით სახლში დატოვეო). თან ჩვენ თარჯიმანი არ გვყავსო, თუმცა ამაზე ვუთხარი რომ მღვდელს მე გადავუთარგმნიდი საუბარს. კარგიო, ბატონ ზაზას შევუთანხმდებიო".

რატომ არის მნიშვნელოვანი: ლიპარტიანის თქმით, როდესაც მოგვიანებით კვერნაძემ დაურეკა, მღვდლის მიყვანაზე უარი უთხრა და უტაქტოდ არაერთხელ შეაწყვეტინა საუბარი, რაზეც მან მიუთითა, რომ უზრდელური საქციელია.

• სასულიერო პირი ამბობს, რომ ამის შემდეგ სააგენტოს თანამშრომელმა შეაგინა.
• "შენ მე ვინ გგონივარო, ამხელა კაცი ვარო, შენი დედა მოვ**ანო და გამითიშა — ასეთი პასუხი გამცა".

ლიპარტიანი On.ge-სთან აცხადებს, ურთიერთობის ფორმა, რაც სააგენტომ აირჩია, თავიდანვე აბსოლუტურად მიუღებელი იყო, რადგან არათუ დაიწყეს შეთანხმება შეხვედრაზე, არამედ დაიბარეს უკვე დათქმულ დროს.

• ის განმარტავს, რომ თავიდანვე გადაწყვიტეს, რომ არ სურდათ ამ ორგანიზაციასთან რაიმე კავშირი.

• ლიპარტიანის თქმით, რელიგიის სააგენტო გააქტიურდა მათთან მიმართებით იმიტომ, რომ არიან სოციალურად აქტიური და ეწევიან ადამიანის უფლებათა აქტივიზმს.
• "ახლახანს საქართველოში იყო ეპისკოპოსი, ჩატარდა ღვთისმსახურება, სხვადასხვა რელიგიური ლიდერებიც მოვიდნენ და ალბათ, ეს ნახეს, იფიქრეს, რომ ეს რელიგიური ჯგუფი მყარდება, იზრდება, მიხვდნენ, რომ ჩვენი კონტროლი სჭირდება", — ამბობს ის.
• ასევე, ლიპარტიანის აზრით, შეხვედრის ერთ-ერთი შესაძლო მთავარი მიზეზი, შეიძლება, რომ იყოს ანგლიკანური ეკლესიის მიერ ცოტა ხნის წინ ერთნაირსქესიანთა წყვილის საჯარო ჯვრისწერის ცერემონიის ჩატარება.

რელიგიის საკითხთა სააგენტო მთავრობის 2014 წლის 19 თებერვლის დადგენილებით შეიქმნა და არაერთხელ გახდა კრიტიკის ობიექტი. არასმთავრობოები პრემიერის დაქვემდებარებაში მოქმედი სააგენტოს ნეგატიურ როლზე საუბრობდნენ.

• "სააგენტოს კრიტიკა ბუნებრივია, რადგან შეუძლებელია სახელწიფომ შეძლოს რელიგიურ გაერთიანებებთან ეფექტიანი და მჭიდრო კოორდინაცია, თუკი ამ საკითხებზე მომუშავე ორგანო დისკრედიტირებულია და რელიგიური გაერთიანებები ამ უწყებასთან ღია და მჭიდრო კომუნიკაციას უფრთხიან", — წერდა EMC 2020 წლის ანგარიშში.
• 2021 წელს NGO-ებმა და რელიგიურმა ორგანიზაციებმა მოუწოდეს ხელისუფლებას, გაეუქმებინა სააგენტო და შეექმნა ამ სფეროში რეფორმების დემოკრატიული და ინკლუზიური პროცესი.
• მათი შეფასებით, სააგენტოს არ უზრუნია ისეთი საკითხების გადაჭრაზე, როგორიცაა დისკრიმინაციული ჩანაწერები კანონმდებლობაში, რელიგიური უმცირესობების უფლებებისა და საჭიროებების უგულებელყოფა, რელიგიური შეუწყნარებლობით მოტივირებულ დანაშაულებზე არაეფექტიანი რეაგირება და ა.შ.