ოკუპირებულ ხერსონში სტრატეგიული მნიშვნელობის ანტონოვსკის ხიდი უკრაინის თავდასხმის შედეგად ჩაკეტილია.

რატომ არის მნიშვნელოვანი: ოკუპანტები ხერსონის ოლქს მარტიდან აკონტროლებენ. კონტრშეტევა უკრაინის არმიამ რამდენიმე კვირაა დაიწყო და თავდასხმის გაძლიერებას ცდილობენ.

  • ხიდი მდინარე დნეპრზე გამავალი ორი გზიდან ერთ-ერთია, რომლითაც რუსეთს შეუძლია მოამარაგოს ან გაიყვანოს თავისი ძალები.
  • ანტონოვსკის ხიდს უკრაინამ 19 ივლისსაც შეუტია, თუმცა მაშინ მნიშვნელოვანი დაზიანება არ მიუყენებია.
  • სამხრეთ უკრაინის თავდაცვის ძალების პრესსპიკერმა ისაუბრა, რომ სამხედროები ცეცხლის ქვეშ აკონტროლებენ რუსი დამპყრობლების სტრატეგიულად მნიშვნელოვან ლოჯისტიკურ და სატრანსპორტო მარშრუტებს ხერსონის რეგიონში, რათა თავიდან აიცილონ მათი მომარაგება.

დეტალები: The Guardian წერს, რომ ხიდზე 18-მდე აფეთქება მოხდა. გამოცემა აღნიშნავს, რომ რუსეთის ანტისარაკეტო საჰაერო თავდაცვა, როგორც ჩანს, ვერ ახერხებს დარტყმების შეჩერებას.

  • შეიარაღებული ძალების სტრატეგიული კომუნიკაციების დეპარტამენტმა გამოაქვეყნა ვიდეო, სადაც ჩანს ხიდის დაზიანების მასშტაბი.

რუსული მმართველობის ქვეშ დარჩენილი ხერსონის სამხედრო-საოლქო ადმინისტრაციის თავმჯდომარის მოადგილე ამბობს, რომ ამ დროისთვის ხიდი მთლიანად დაკეტილია და სატრანსპორტო მოძრაობა არ ხორციელდება. მის კომენტარს კრემლისტური მედია TASS ავრცელებს.

  • მისივე თმით, ხიდს უკრაინელებმა აშშ-ის მიერ მიწოდებული სარაკეტო სისტემებიდან (HIMARS) დაარტყეს.

უკრაინა ცდილობს, დაბლოკოს გზები, რომლის გამოყენებითაც რუსეთს შეუძლია ხერსონსა თუ მის გარშემო იარაღის გადატანა.

  • "ოკუპანტებმა უნდა ისწავლონ ცურვა მდინარე დნეპრზე. ან უნდა დატოვოს ხერსონი, სანამ ეს ჯერ კიდევ შესაძლებელია. შეიძლება არ იყოს მესამე გაფრთხილება", — დაწერა პრეზიდენტის ადმინისტრაციის უფროსის მრჩეველმა მიხაილო პოდოლიაკმა.
  • "ჩვენ არ ვანადგურებთ ინფრასტრუქტურას, ჩვენ ვანგრევთ მტრის გეგმებს", — თქვა სამხრეთ უკრაინის თავდაცვის ძალების პრესსპიკერმა.
  • Unian-მა გამოაქვეყნა ვიდეო, რომელიც დღეს, 27 ივლისის დილითაა გადაღებული და ჩანს, რომ ხიდზე მოძრაობა შეჩერებულია.