საქართველოს საპატრიარქო, ყაზბეგის რაიონსა და მთიულეთში ელექტროგადამცემი ხაზების გადაყვანის პროტესტს ეხმაურება. გავრცელებულ განცხადებაში ნათქვამია, რომ ერთის მხრივ, გასაგებია სამინისტროს პოზიცია ეკონომიკური წისვლის შესახებ, თუმცა მათივე აზრით, ტურიზმის განვითარებაც მთავარი მიზანია და ამიტომ ამგვარი ქმედება მთის ტურიზმის განვითარებას შეაფერხებს:

"უცხოელებს, ჩვენს კულტურასთან ერთად, ხელუხლებელი ბუნება და ეკოლოგიურად სუფთა გარემოც იზიდავთ. მთის ოჯახური ტურიზმი ერთ-ერთი სერიოზული მიმართულებაა და მას ხელი არ უნდა შეეშალოს. არადა, დასახლებულ პუნქტებთან მაღალი ძაბვის სადენების სიახლოვე ამ მხრივაც უარყოფითად იმოქმედებს".

საპატრიარქოს განცხადებაში წერია, რომ გამოსავალი უნდა მოიძებნოს თუნდაც ეს დამატებით ფინანსურ ხარჯებთან იყოს დაკავშირებული:

"სჯობს, გარკვეული თანხები გაიღონ, ოღონდ, სადაც არის შესაძლებელი, შემხვედრი ნაბიჯები გადაიდგას და ხალხმა თანადგომა დაინახოს.

გასათვალისწინებელია ისიც, რომ ხელისუფლებამ დიდი ძალისხმევა ჩადო მთის კანონის შემუშავებასა და მის რეალიზაციაში და მოსახლეობას მაღალმთიან რეგიონებში არათუ დარჩენის, ქალაქებიდან დაბრუნების სურვილი გაუჩინა. ეს განწყობა, ეს მიღწევა არ უნდა გაუფერულდეს".

დღეს ენერგეტიკის მინისტრმა კახა კალაძემ განაცხადა, რომ სოფელ ჭართალისა და მუგუდის მოსახლეობის პროტესტი, მაღალი ძაბვის გადამცემი ხაზების მონტაჟთან დაკავშირებით, დესტრუქციული ძალების მიერაა პროვოცირებული.