ნეტფლიქსის პოპულარული სერიალის, Stranger Things-ის მეოთხე სეზონის ფინალური სერიების გამოშვების შემდეგ სტრიმინგ პლატფორმა მომხმარებელთა ნაწილისთვის ხელმიუწვდომელი იყო. სერიალის გულშემატკივრები 1-ელ ივლისს განსაკუთრებულად ელოდებოდნენ და ნეტფლიქსის სერვისის გათიშვა, სავარაუდოდ, სწორედ მაყურებელთა დიდ რიცხვს უკავშირდება.

ვებსაიტების გათიშვის ცნობის გვერდ Downdetector.com-ზე, აღმოსავლეთ ამერიკის დროით დილის 3 საათზე — მაშინ, როცა სტრიმინგ პლატფორმაზე ფინალური სერიები დაიდო — ნეტფლიქსთან დაკავშირებული პრობლემების განცხადებებმა სწრაფად მოიმატა. ვებგვერდზე სერვისის გათიშვის შესახებ, დაახლოებით, 13 ათასი ადამიანი იტყობინებოდა. თუმცა, ნახევარ საათში, როგორც ჩანს, მდგომარეობა გამოსწორდა.

Stranger Things-ის მეოთხე სეზონი გამოსვლიდან პირველი ოთხი კვირის განმავლობაში ყველაზე პოპულარული ინგლისურენოვანი სერიალი იყო ნეტფლიქსზე. ამით მან რეკორდიც მოხსნა.

Stranger Things ნეტფლიქსის ერთ-ერთი ყველაზე წარმატებული პროექტია, რომელიც საი-ფაისა და საშინელებათა ჟანრის ნაზავს წარმოადგენს. სერიალის პირველი სეზონის პრემიერა 2016 წელს შედგა. მას შემდეგ ის არაერთ პრესტიჟულ დაჯილდოებაზე იყო ნომინირებული, მათ შორის, ოქროს გლობუსზე. როგორც ცნობილია, მილიონობით მაყურებლის ფავორიტი სერიალი მეხუთე სეზონით დასრულდება.

ასევე იხილეთ: