ლელოს ერთ-ერთი ლიდერის, ბადრი ჯაფარიძის განცხადებით, მმართველი პარტიის მიერ დაორგანიზებულ ჯგუფებში იყვნენ საჯარო სამსახურის თანამშრომლები და ქართული ოცნების შტაბის აქტიური წევრები.

რატომ არის მნიშვნელოვანი: 3 ივლისამდე ოპოზიცია და სამოქალაქო საზოგადოება რაიონებში მოსახლეობასთან ინფორმაციულ შეხვედრებს აწყობენ, სადაც საქართველოს ევროპულ მომავალს და ეროვნული თანხმობის იდეას განიხილავენ.

  • დღეს დაპირისპირება არამხოლოდ ყვარელში, არამედ სხვა ქალაქებშიც იყო.

დეტალები: ჯაფარიძე ამბობს, რომ აგრესიულად განწყობილი ჯგუფები მათ მიზანმიმართულად უშლიდნენ ხელს შეხვედრების ჩატარებაში და მომხდარის გამო კანონით გათვალისწინებულ ყველა ნაბიჯს გადადგამენ.

  • "ის, რაც ახლა ამ ადამიანებმა ჩაიდინეს, ეს არის სისხლის სამართლის დანაშაული, იმიტომ რომ ხელი შეუშალეს ჩვენს პოლიტიკურ საქმიანობას".
  • "ეს ყველაფერი აღწერილია, აღნუსხულია, დოკუმენტირებულია და ეს მიუთითებს იმაზე, რომ ეროვნული თანხმობის იდეის სანაცვლოდ ქართული ოცნება გვთავაზობს დაპირისპირებას, აგრესიას, თავდასხმას".
  • On.ge-ს შინაგან საქმეთა სამინისტროში განუცხადეს, რომ მომხდარზე ინფორმაციას არკვევენ.

გარდა ამისა, ლელოს დეპუტატმა, სალომე სამადაშვილმა იმ ადამიანების ფოტოები გამოაქვეყნა, ვინც მისი თქმით, ჯაფარიძეს თავს დაესხნენ.

  • "ყველა გაიშიფრა, ყველა ოცნების დაქირავებულია, მომავალშიც ყველას ავღრიცხავთ. პასუხსაც აგებთ".