უკრაინის დაზვერვის ინფორმაციით, დღეს რუსეთთან მორიგი გაცვლა ჰქონდათ და შედეგად, 144 უკრაინელი სამხედრო დაიბრუნეს.

რატომ არის მნიშვნელოვანი: ალყაში მოქცეული მარიუპოლის მცველები ქალაქს დიდი ხნის განმავლობაში არ უთმობდნენ რუსეთის არმიას. მათი თავგანწირვა მთელი მსოფლიოსთვის მაგალითი გახდა.

  • აზოვსტალის ტერიტორია მებრძოლებმა რუსეთთან შეთანხმებით დატოვეს და ქარხანას საოკუპაციო ძალები აკონტროლებენ.
  • ევაკუაციის შემდეგ, რუსეთში ზოგიერთმა პოლიტიკოსმა დაიწყო საუბარი იმაზე, რომ უკრაინელი სამხედროები სიკვდილით უნდა დაესაჯათ ან გაესამართლებინათ.

დეტალები: აზოვსტალის 95 დამცველიდან 43 აზოვის პოლკის ჯარისკაცია.

  • გათავისუფლებული უკრაინელების უმეტესობას სერიოზული დაზიანებები აღენიშნება.
  • დაზვერვის განცხადებით, ყველა მათგანს სათანადო სასწრაფო სამედიცინო და ფსიქოლოგიურ დახმარებას უწევენ.

რა ხდებოდა მანამდე: საერთაშორისო მედიაში 7 ივნისს გავრცელდა ინფორმაცია იმაზე, რომ რუსეთმა აზოვსტალის ქარხანაში დაღუპული სამხედროების ცხედრების უკრაინისთვის გადაცემა დაიწყო.

  • მალევე უკრაინის თავდაცვის სამინისტროს დაზვერვის მთავარმა სამმართველომ განაცხადა, რომ მარიუპოლის 210 მცველის ცხედარი დაიბრუნეს.
  • მოგვიანებით უკრაინამ კიდევ 64 ცხედარი დაიბრუნა.

ამბავი არქივიდან: მარიუპოლი რუსეთის უკრაინაში შეჭრის პირველივე დღეებიდან ალყაში იყო. ქალაქს აზოვსტალში მყოფი სამხედროები იცავდნენ.