უზენაესი სასამართლოს ყოფილმა მოსამართლემ, ბესარიონ ალავიძემ ქართული ოცნების დამფუძნებელ ბიძინა ივანიშვილს ღია წერილით მიმართა.

რატომ არის მნიშვნელოვანი: არასამთავრობო სექტორი, საერთაშორისო პარტნიორები და ოპოზიცია ხშირად საუბრობს სასამართლო კლანზე და აღნიშნავენ, რომ ისინი გადაწყვეტილებებს მმართველი გუნდის პოლიტიკური დაკვეთით იღებენ.

  • პარტნიორებმა უკან გადადგმულ ნაბიჯად შეაფასეს მოსამართლეთა არჩევა უზენაეს სასამართლოში.
  • სასამართლო რეფორმის მნიშვნელობაზე ხაზგასმული იყო შარლ მიშელის დოკუმენტშიც.

დეტალები: მოსამართლე ივანიშვილს მიმართავს, რომ ახლა აქვს შესაძლებლობა ისტორიაში შევიდეს, როგორც წინაპრების გზის გამგრძელებელი, რომლებსაც ევროპულ ოჯახში დაბრუნება და დამოუკიდებელი სასამართლოს დაფუძნება სურდათ.

  • "თქვენ მე მიცნობთ და შესწავლილი გაქვთ ჩემი ფსიქოლოგია, ხშირად ყოფილა ჩემი პიროვნება თქვენს კაბინეტებში განხილვის საგანი, კარგად თუ ავად, არაერთხელ მიმიღია შემოთავაზება მაღალ თნამდებობაზე, თუმცა არცერთხელ არ მივიღე თქვენი წინადადება".
  • "რომ არ დაგღალოთ და ზედმეტად დაგტვირთოთ ემოციებით, მინდა პირდაპირ გითხრათ ის, რაც თქვენთვის მაქვს სათქმელი — მოგიწოდებთ უშუალოდ მიმართოთ სასამართლოს "კლანის" წევრებს, "შინაურულად" და ურჩიოთ სახლში წასვლა".

მოსამართლე წერს, რომ სასამართლო კლანის უვადოდ ჩაბეტონებით ივანიშვილმა საფრთხის წინაშე დააყენა ქვეყნის ეროვნული ინტერესები. მისივე თქმით, ახლა აქვს შანსი, რომ "გააუვნებელყოს მის ხელში არსებული ნაღმი" და შეასრულოს ისტორიული მისია.

  • "გულწრფელად გეტყვით და სრული პასუხისმგებლობით, ის ადამიანები, რომელთაც თქვენ ნდობა გამოუცხადეთ, ასე უხსნიდნენ მოსამართლეებს, მათ შორის მეც, "ახალი მორჩილების" ამბავს — "ჩვენ ყველა იმ ხელისუფალს უნდა ვემსახუროთ, რომელიც უმრავლესობით მოვა, ასე ვიყავით ნაციონალების დროს, ასე უნდა ვიყოთ ახლა და მომავალში ვინც მოვა იმასთან ვიქნებითო".
  • "სწორედ ეს ადამიანები კარნახობდნენ მოსამართლეებს რა გადაწყვეტილება უნდა მიეღოთ, ვიდრე თქვენ ოპოზიციაში იყავით, დროს ყველაფერი შეუძლია, რა იცით, იქნებ აღმოჩნდეთ ნაცნობ, მძიმე სიტუაციაში და ისევ დაგჭირდეთ სამართლიანი სასამართლო, გაძლევთ გარანტიად საკუთარ სიცოცხლეს რომ ამას ვერ მიიღებთ "კლანური" მმართველობის პირობებში".

წერილის ბოლოს ალავიძე ივანიშვილს მიმართავს, რომ თუ მისი საჯარო განცხადების გამო ოჯახის წევრებს ან ახლობლებს მცირედი საფრთხე მაინც შეექმნებათ, პასუხისმგებელი თავად ივანიშვილი იქნება.